భారత్కు చెందిన ప్రముఖ డిజిటల్ వ్యాలెట్, పేమెంట్స్ కంపెనీ మొబిక్విక్ ఈ ఏడాది సెప్టెంబర్లో తొలి పబ్లిక్ ఇష్యూకి రానుంది. ఈ ఐపీఓ ద్వారా దాదాపు 200 నుంచి 250 మిలియన్ డాలర్లు సేకరించే అవకాశం ఉందని సమాచారం. ఈ నేపథ్యంలో వినియోగదారుల డేటా లీకైనట్లు వచ్చిన వార్తల్లో నిజం లేదని తేల్చిచెప్పింది ఆ సంస్థ.
వినియోగదారులకు సంబంధించిన సమాచారం సమారు 8.2 టీబీ లీకైనట్లు సైబర్ సెక్యూరిటీ పరిశోధకుడు రాజశేఖర్ రాజహరియా, ఫ్రెంచ్ పరిశోధకుడు ఇలియట్ అల్డర్సన్ ట్వీట్ చేశారు. యూజర్లకు సంబంధించిన ఫోన్ నంబర్లు, ఈమెయిల్స్, పాస్వర్డ్లు, చిరునామాలు, బ్యాంక్ ఖాతాలు, వివిధ కార్డుల వివరాలు మొత్తం అందులో ఉన్నాయని తెలిపారు.
అయితే వారి ఆరోపణలను మొబిక్విక్ ఖండించింది. ఈ విషయంపై తాము దర్యాప్తు చేశామని, ఎటువంటి భద్రతా లోపాలు కనిపించలేదని స్పష్టం చేసింది. వినియోగదారుల డేటా పూర్తిగా సురక్షితంగా ఉందని పేర్కొంది. పరిశోధకులు అని చెప్పుకునే తిరిగే వారు తమ సంస్థ, మీడియా విలువైన సమయాన్ని వృథా చేస్తున్నారని మండిపడింది.
ఇప్పటివరకు ఇదే అతి పెద్ద కేవైసీ డేటా లీకేజీ అని అల్డర్సన్ ట్వీట్ చేశారు. మరో వైపు రాజహరియా 11 కోట్ల మంది భారతీయుల కార్డు డేటా లీకైనట్లు ట్వీట్ చేశారు. ఇందులో పాన్, ఆధార్ కార్డు వివరాలు కూడా ఉన్నట్లు తెలిపారు.
ఇదీ చూడండి: జొమాటో ఐపీఓ.. వచ్చే నెల సెబీకి దరఖాస్తు?
