కరోనా వైరస్ కట్టడిలో భాగంగా దేశవ్యాప్తంగా విధించిన లాక్డౌన్తో కార్ల అమ్మకాలు ఇటీవల రికార్డు స్థాయిలో పడిపోయాయి. లాక్డౌన్ ఎత్తేసిన తర్వాత కూడా కొనుగోళ్లు అంతంత మాత్రంగానే ఉన్నాయి. ఈ నేపథ్యంలో విక్రయాలు పెంచుకునేందుకు కార్ల తయారీ సంస్థలు భారీ ఆఫర్లు ఇస్తున్నాయి. పండుగ సీజన్ కూడా సమీపిస్తున్న నేపథ్యంలో దిగ్గజ కార్ల తయారీ సంస్థలు ఇప్పటికే ఆఫర్లు ప్రకటించాయి. మరిన్ని సంస్థలు త్వరలోనే ఆఫర్లు ప్రకటించేందుకు సిద్ధమవుతున్నాయి.
ఏ కంపెనీ.. ఏ మోడల్పై.. ఎంత ఆఫర్ ఇస్తోంది? అనే వివరాలు ఇలా ఉన్నాయి.
మారుతీ సుజుకీ
దేశీయ అతిపెద్ద కార్ల తయారీ సంస్థ మారుతీ సుజుకీ ప్రారంభ స్థాయి మోడల్ ఆల్టో 800 నుంచి మిడ్ రేంజ్లో భారీగా అమ్ముడయ్యే స్విఫ్ట్, ఇతర మోడళ్లపై భారీ డిస్కౌంట్లను ప్రకటించింది. కనిష్ఠంగా రూ.20 వేల నుంచి గరిష్ఠంగా రూ.47 వేల వరకు డిస్కౌంట్ ఇస్తున్నట్లు తెలిపింది. బీమా, ఇతర యాక్సెసరీస్ కొనుగోలు చేసే వారికి అదనపు ప్రయోజనాలు కూడా అందించనున్నట్లు తెలిపింది.
హుందాయ్
హుందాయ్ ప్రారంభ స్థాయి మోడల్, భారీ ఆదరణ ఉన్న శాంత్రోపై రూ.35 వేల వరకు డిస్కౌంట్ ప్రకటించింది. మిడ్ రేంజ్లో ఎక్కువగా అమ్ముడయ్యే ఐ10, ఐ20 మోడళ్లపై కూడా రూ.15 వేల నుంచి రూ.25 వేలు డిస్కౌంట్ ఇస్తోంది.
హోండా
ఇతర కంపెనీలతో పోల్చుకుంటే.. జపాన్కు చెందిన హోండా అత్యధికంగా రూ.2.5లక్షల వరకు డిస్కౌంట్ ఇస్తోంది. హోండా సివిక్ డీజిల్ వేరియంట్పై ఈ తగ్గింపు ప్రకటించింది. హోండాలో ఎక్కువగా ఆదరణ దక్కించుకున్న సీటీ మోడల్పై కూడా రూ.1.6 లక్షల వరకు డిస్కౌంట్ ఇస్తోంది.
టాటా
టాటా మోటార్స్ కనిష్ఠంగా రూ.5 వేల నుంచి గరిష్ఠంగా రూ.85 వేల వరకు డిస్కౌంట్ ఇస్తోంది. డిస్కౌంట్లో లభించే మోడళ్లలో నెక్సాన్, టియాగో, టిగోర్, హారియర్ వంటి మోడళ్లు ప్రధానంగా ఉన్నాయి.
ఇదీ చూడండి:ఈ-కామర్స్ విస్తరణకు రిలయన్స్ దూకుడు
