రికార్డు స్థాయిల నుంచి వెనక్కి తగ్గిన స్టాక్ మార్కెట్లు.. ఈ వారం కూడా కాస్త ఒడుదొడుకులు ఎదుర్కోవచ్చని విశ్లేషకులు అంచనా వేస్తున్నారు. ముఖ్యంగా డెరివేటివ్స్ కాంట్రాక్టుల గడువు ముగియనుండటం, వారంలో నాలుగు రోజులే మార్కెట్లు పని చేయనుండటం, కేంద్ర బడ్జెట్పై అంచనాలు వంటివి ఇందుకు కారణం కావొచ్చంటున్నారు.
- గణతంత్ర దినోత్సవం సందర్భంగా మంగళవారం (జనవరి 26) మార్కెట్లకు సెలవు.
కంపెనీల త్రైమాసికాల ఫలితాల ప్రభావం, అమెరికా ఫెడ్ ద్రవ్య విధాన నిర్ణయాలూ మార్కెట్లపై ప్రభావం చూపొచ్చని నిపుణులు విశ్లేషిస్తున్నారు.
యాక్సిస్ బ్యాంక్, మారుతీ సుజుకీ, లుపిన్, హెచ్యూఎల్, టాటా మోటార్స్, బ్యాంక్ ఆఫ్ బరోడా సహా పలు దిగ్గజ సంస్థలు ఈ వారం క్యూ3 ఫలితాలు ప్రకటించనున్నాయి. ఈ ప్రభావం ఆయా షేర్లపై ప్రధానంగా ఉండనుందని స్టాక్ బ్రోకర్లు చెబుతున్నారు.
'బడ్జెట్పై అంచనాలు, అమెరికా నూతన ప్రభుత్వం తీసుకునే కీలక నిర్ణయాలు మార్కెట్లకు దిశా నిర్దేశం చేయొచ్చు.' అని జియోజిత్ ఫినాన్షియల్ సర్వీసెస్ పరిశోధన విభాగాధిపతి వినోద్ నాయర్ పేర్కొన్నారు.
వీటన్నింటితో పాటు కరోనా అప్డేట్స్, రూపాయి, ముడి చమురు ధరల్లో హెచ్చుతగ్గులు మార్కెట్లను ప్రభావితం చేసే సాధారణ అంశాలుగా ఉండనున్నాయి.
ఇదీ చూడండి:'బీమా అవసరాన్ని కరోనా గుర్తు చేసింది'
