ఒక ట్వీట్ను వేలం వేయడమేంటి! దాన్ని కొనడానికి పోటీపడటమేంటి!.. ట్విట్టర్ సీఈఓ జాక్ డోర్సీ తొలి ట్వీట్ వేలంలో రూ. 21కోట్లకు అమ్ముడుపోయిందని తెలిసినప్పుడు అందరిలోనూ అదే ఆశ్చర్యం. అసలు ఒక ట్వీట్ను ఎందుకు కొంటారు? కొంటే ఏం వస్తుందన్న సందేహాలూ కలిగాయి. అది అర్థమవ్వాలంటే డిజిటల్ ప్రపంచాన్ని ఊపేస్తున్న నాన్ ఫంగిబుల్ టోకెన్స్(ఎన్ఎఫ్టీ) గురించి తెలుసుకోవాల్సిందే. వీటి ద్వారా ట్వీట్లు, క్రీడాకారుల ఫీట్లు, అభిమాన గాయకుడి పాటలు, ప్రముఖ చిత్రకారుడి కళాఖండం ఇలా దేన్నైనా ఎంచక్కా కొనుక్కోవచ్చు. వాటికి యజమానులై పోవచ్చు. అయితే ఓ షరతు.. అది డిజిటల్ ప్రపంచంలో మాత్రమే. కొన్ని నెలల్లోనే మిలియన్ల డాలర్ల వ్యాపారంగా ఎదిగి ఎలాన్ మస్క్ లాంటి ప్రముఖులనూ ఆకర్షిస్తోంది ఎన్ఎఫ్టీ సామ్రాజ్యం.
ఏమిటీ ఎన్ఎఫ్టీ?
నాన్ ఫంగిబుల్ టోకెన్స్(ఎన్ఎఫ్టీ) అంటే ఒక్క మాటలో డిజిటల్ ఆస్తులు అని చెప్పొచ్చు. డిజిటల్ మాధ్యమంలో సృష్టించిన ట్వీట్, చిత్రం, వీడియో లాంటి సృజనను సదరు రూపకర్త అమ్మకానికి ఉంచొచ్చు. దాన్ని డిజిటల్ వెర్షన్ను కొన్న వారికి అందుకు సంబంధించిన యాజమాన్య హక్కులను బదలాయిస్తారు. ఆ డిజిటల్ ఫైల్కు బ్లాక్ చెయిన్ సాంకేతిక పరిజ్ఞానంతో ఓ విశిష్ఠ సంఖ్యను కేటాయిస్తారు. అంటే ఆ డిజిటల్ వెర్షన్ ప్రపంచంలో ఒక్కటే ఉంటుంది. దానికి ఒక్కరే యజమాని ఉంటారు. దీంతోపాటు యాజమాన్య వివరాలను బ్లాక్ చెయిన్ ఆధారిత పబ్లిక్ లెడ్జర్లో నమోదు చేస్తారు. దీని ద్వారా ఆ డిజిటల్ వెర్షన్కు యజమాని ఎవరన్నది ప్రపంచంలో ఎక్కడ నుంచైనా ఎవరైనా చూడొచ్చు. హ్యకింగ్కు వీలుకాని బ్లాక్ చైన్ సాంకేతికత వల్ల యాజమాన్య వివరాలను ఇతరులెవరూ మార్చడానికి సాధ్యం కాదు. భవిష్యత్తులో ఆ డిజిటల్ ఫైల్ను ఇంకెవరికైనా అమ్ముకోవచ్చు. అలా జరిగే లావాదేవీల వివరాలనూ డిజిటల్ లెడ్జర్లో నమోదు చేస్తారు.
మిలియన్ల డాలర్ల మార్కెట్
ఎన్ఎఫ్టీల ట్రెండ్ 2017లో మొదలైనప్పటికీ 2020 చివరి నుంచి ఊహించని రీతిలో పుంజుకుంది. గతేడాదే ఎన్ఎఫ్టీ మార్కెట్ విలువ దాదాపు మూడింతలు పెరిగిందని, ప్రస్తుతం అది దాదాపు 250 మిలియన్ల డాలర్లకు చేరిందని నిపుణులు చెబుతున్నారు. భవిష్యత్తులో ఇది మరింత వేగంగా విస్తరిస్తుందని అంటున్నారు.
కాదేదీ అమ్మకానికి అనర్హం..
ట్వీట్లు, క్రీడల వీడియోలు, డిజిటల్ చిత్రాలు, ఫోటోలు, పాటలు, టెక్ట్స్ ఇలా అన్నిటినీ ఎన్ఎఫ్టీల రూపంలో అమ్మకానికి ఉంచుతున్నారు. అరుదైన వస్తువులను సేకరించడం హాబీగా ఉన్నట్లే ఇప్పుడు ఎన్ఎఫ్టీలను సొంతం చేసుకోవడం క్రేజ్గా మారింది. ఈ ధోరణి చిత్రకారులు, సంగీత కళాకారులు, క్రీడలు, వినోద రంగ సంస్థలకు వరంలా మారింది. డిజిటల్ చిత్రకారుడు మైక్ వింకిల్మాన్ గీసిన ఓ చిత్రం 6.9 కోట్ల డాలర్లకు అమ్ముడుపోయింది. కరోనాతో కచేరీలు రద్దై ఇబ్బందులు పడుతున్న సంగీత కళాకారులకు ఎన్ఎఫ్టీలు కొత్త ఆదాయ మార్గాలుగా మారాయి. వారు తమ పాటలను రికార్డు చేసి డిజిటల్ వెర్షన్ను అమ్ముతున్నారు. ఆ ఎన్ఎఫ్టీలపై భవిష్యత్తులో జరిగే క్రయవిక్రయాలపైనా వారికి రాయల్టీ అందుతుంది. డీజే కళాకారుడు జస్టిన్ బ్లా ఆల్బమ్కు ఎన్ఎఫ్టీల రూపంలో 17 మిలియన్ల డాలర్లు వచ్చాయి. నేషనల్ బాస్కెట్ బాల్ అసోసియేషన్ సంస్థ ఆటలోని హైలెట్ల వీడియోలను వేల డాలర్లకు విక్రయిస్తోంది. ఇతర వినియోగదారులు వాటిని య్యూట్యూబ్లో ఉచితంగా వీక్షించే వెసులు బాటు ఉన్నా తమకు నచ్చిన ఆటగాళ్లకు సంబంధించిన డిజిటల్ వెర్షన్లను సొంతం చేసుకోవలన్న భావనతో అభిమానులు ఆసక్తి చూపుతున్నారు. డిజిటల్ వెర్షన్లకు కాలం గడిచేకొద్దీ అదనపు విలువ చేకూరుతుందని, అవి భవిష్యత్తులో మరింత ఎక్కువ ధరకు అమ్ముడుపోతాయన్నది విశ్లేషకుల మాట. 'ఇది కేవలం ట్వీట్ కాదు.. మోనాలిసా చిత్రంలాగా దీని అసలైన విలువ ఎంతో భవిష్యత్తులో తెలుస్తుంది' అని డోర్సీ తొలి ట్వీట్ను కొన్న సినా ఎస్టవీ చెప్పడం గమనార్హం. ప్రముఖ వ్యాపారవేత్త ఎలాన్ మస్క్ ఎన్ఎఫ్టీల క్రేజ్పై రూపొందించిన ఓ పాటను వేలానికి ఉంచారు.
ఇదీ చదవండి: 'మోదీ కృషితో ప్రైవేట్ రంగంలో అపార అవకాశాలు'
