ఈ వారం స్టాక్ మార్కెట్లకు అంతర్జాతీయ అంశాలే కీలకం కానున్నాయి. దేశీయంగా ఎలాంటి వార్తలు, ప్రకటనలు లేనందున మదుపరులు.. కొవిడ్ టీకా, అమెరికా ఉద్దీపన ప్యాకేజీలపై దృష్టి సారించే అవకాశం ఉందని నిపుణులు అంచనా వేస్తున్నారు.
ఈ వారాంతంలో శుక్రవారం క్రిస్మస్ సందర్భంగా మార్కెట్లకు సెలవు. ఎఫ్ అండ్ ఓ డెరివేటివ్ల గడువు ముగింపు నేపథ్యంలో మార్కెట్లు ఒడుదొడుకులకు లోనవ్వచ్చని మోతీలాల్ ఓస్వాల్ ఫినాన్షియల్ సర్వీసెస్ రిటైల్ అధిపతి(రీసెర్చ్) సిద్ధార్థ ఖేమ్కా అభిప్రాయపడ్డారు.
దేశీయ సూచీలు ఇటీవల రికార్డు స్థాయి గరిష్ఠాలను తాకిన నేపథ్యంలో.. ఈ వారం మదుపరులు అడపాదడపా లాభాల స్వీకరణకు దికే అవకాశాలే ఎక్కువని విశ్లేషించారు.
''కరోనా వ్యాక్సిన్లపై సానుకూల వార్తలు, అమెరికా ఉద్దీపన ప్యాకేజీపై పెరుగుతున్న అంచనాలతో మార్కెట్లు లాభాల్లోనే కదలాడొచ్చు. అయితే.. ఈ వారాంతానికి ముందు క్రిస్మస్ సెలవు నేపథ్యంలో.. లాభాల స్వీకరణ అవకాశాలను కొట్టిపారేయలేం.''
- సిద్ధార్థ ఖేమ్కా, మోతీలాల్ ఓస్వాల్
అమెరికా ఉద్దీపన ప్యాకేజీ, బ్రెగ్జిట్ ఒప్పందం వంటి అంతర్జాతీయ అంశాలు.. మార్కెట్లపై గణనీయమైన ప్రభావం చూపనున్నట్లు తెలిపారు జియోజిత్ ఫినాన్షియల్ సర్వీసెస్ అధిపతి(రీసెర్చ్) వినోద్ నాయర్.
ఇదీ చూడండి: ఒడుదొడుకుల ట్రేడింగ్లోనూ రికార్డు గరిష్ఠాలు
