త్రిబుల్​ ధమాకా - ఈనెల 26 నుంచి వారందరికీ డబ్బులే డబ్బులు

రాష్ట్రంలో 1.40 కోట్ల మందికి రైతు భరోసా - 11 లక్షల నిరుపేద కూలీ కుటుంబాలకు ఇందిరమ్మ ఆత్మీయ భరోసా - మూడు కోట్ల మందికి సన్న బియ్యం ఇచ్చేందుకు సిద్ధం

Two Major Schemes in Telangana : రాష్ట్ర ప్రభుత్వం 1.40 కోట్ల ఎకరాలకు రైతు భరోసా, 11 లక్షల నిరుపేద రైతు కూలీల కుటుంబాలకు ఇందిరమ్మ ఆత్మీయ భరోసా, మూడు కోట్ల మందికి సన్న బియ్యం ఇచ్చేందుకు సిద్ధమైంది. ఈ నెల 26వ తేదీ నుంచి రైతు భరోసా, ఇందిరమ్మ ఆత్మీయ భరోసా పథకం అమలు చేయనున్న ప్రభుత్వం ఏప్రిల్‌ నుంచి సన్న బియ్యం ఇవ్వాలని నిర్ణయించింది. అర్హులైన ప్రతి ఒక్కరికి లబ్ధి చేకూరేలా చర్యలు తీసుకోవాలని సీఎం రేవంత్‌ రెడ్డి అధికారులను ఆదేశించారు.

కాంగ్రెస్‌ ప్రభుత్వం ఎన్నికల సమయంలో ఇచ్చిన హామీలు ఒక్కొక్కటీ అమలు చేసుకుంటూ పోతోంది. సాగుకు యోగ్యమైన ప్రతి ఎకరాకు రైతు భరోసా ఇవ్వాలని, అర్హులైన రైతు కూలీల కుటుంబాలకు ఇందిరమ్మ ఆత్మీయ భరోసా పథకం అమలు చేయాలని, అర్హత కలిగిన తెల్ల రేషన్​కార్డు దారులకు ఏప్రిల్‌ నుంచి సన్న బియ్యం ఇచ్చేందుకు రాష్ట్ర ప్రభుత్వం సిద్ధమైంది. ఇప్పటికే ఆయా పథకాలకు సంబంధించి జిల్లాల నుంచి వివరాలు తెప్పించుకుని అర్హుల జాబితాలు సిద్ధం చేసింది.

సాగు భూములకే రైతు భరోసా : రాష్ట్రవ్యాప్తంగా వర్షాకాలంలో సాగైన భూమి వివరాలను వ్యవసాయ శాఖ నుంచి ప్రభుత్వం తెప్పించుకుంది. దాదాపు ఒక 1.39 కోట్ల ఎకరాల్లో పంటలు సాగైనట్లు వ్యవసాయ శాఖ ప్రభుత్వానికి నివేదించింది. ఆ శాఖ గణాంకాలను ప్రామాణికంగా తీసుకుని రైతు భరోసా చెల్లించాలని భావించిన ప్రభుత్వం ఆ మేరకు అవసరమైన నిధులను సిద్ధం చేసుకుంది. సాగుకు యోగ్యమైన భూమి కూడా ఇంతకు మించి ఉండే అవకాశం లేదని అంచనా వేస్తున్న ప్రభుత్వం 1.40 కోట్ల ఎకరాలకు రైతు భరోసా ఇచ్చేందుకు సన్నద్ధమవుతోంది. వ్యవసాయ యోగ్యంకాని మైనింగ్‌, కొండలు, గుట్టలకు, రాళ్లకు రప్పులకు, స్థిరాస్తి వెంచర్లకు, అనర్హులకు ఎవరికీ రైతు భరోసా వెళ్లకుండా ఉండేందుకు క్షేత్రస్థాయిలో రెవెన్యూ, వ్యవసాయ శాఖల అధికారులు సంయుక్తంగా తయారు చేసిన సాగుకు యోగ్యమైన భూములకు మాత్రమే చెల్లింపులు జరిగేటట్లు జాగ్రత్తలు తీసుకుంది.

38 లక్షల మందికి ఉపాధి హామీ జాబ్​ కార్డులు : తెలంగాణ రాష్ట్రంలో దాదాపు 38లక్షల ఉపా‌ధిహామీ జాబ్‌ కార్డులు ఉన్నాయి. ఈ కార్డుల నుంచి భూమి కలిగిన వారు రైతు భరోసా కింద లబ్ధి పొందుతున్నందున వారిని పక్కన పెట్టారు. దాదాపుగా 20లక్షల ఎన్​ఆర్జీఎస్ కార్డులు ఉన్నట్లు తేలింది. అయితే గడిచిన రెండేళ్లుగా పని చేసిన కార్డుదారులను అర్హులుగా తీసుకోవాలని ప్రభుత్వం నిర్ణయించింది.

వారికి ఆత్మీయ భరోసా : ఎన్​ఆర్జీఎస్​లో పని చేసే కూలీలు ఇంటికి ఒకరున్నా ఇద్దరున్నా ఒక కుటుంబం కింద పరిగణించనుంది. అలా భూమి లేని నిరుపేద రైతు కూలీ కుటుంబాలకు ఏడాదికి 12వేలు ఇందిరమ్మ ఆత్మీయ భరోసా ఇచ్చేందుకు జాబితా సిద్ధం చేశారు. అలాంటి కుటుంబాలు దాదాపు 11లక్షలు ఉన్నట్లు తెలుస్తోంది. మరొకసారి గ్రామాల వారీగా క్షేత్రస్థాయిలో పరిశీలన చేసి అర్హులైన ప్రతి నిరుపేద రైతు కూలీల కుటుంబాలకు లబ్ధి చేకూరేట్లు చూడాలని అధికారులకు ప్రభుత్వం స్పష్టం చేసింది.

అందరికీ సన్నబియ్యం : రాష్ట్రంలో ఇప్పుడు ఇస్తున్న దొడ్డు బియ్యం తినేందుకు వాడడం లేదని ప్రభుత్వం గుర్తించింది. తెల్ల రేషన్‌ కార్డుల ద్వారా ఇచ్చే సబ్సిడీ బియ్యాన్ని కొందరు అక్రమార్కులు రీసైక్లింగ్‌ చేసి విక్రయించి సొమ్ము చేసుకుంటున్నట్లు గుర్తించిన ప్రభుత్వం తినేందుకు వీలుగా ఉండే సన్న బియ్యం ఇవ్వాలని నిర్ణయించింది. ప్రతి ఒక్కరికి నెలకు ఆరు కిలోలు లెక్క సన్నబియ్యం ఇవ్వాలని నిర్ణయించింది. వచ్చే ఏప్రిల్‌ నుంచి రాష్ట్రంలోని దాదాపు మూడు కోట్ల మందికి నెలకు ఆరు కిలోల లెక్కన ఇవ్వనుంది. కొత్తగా కార్డులు ఇచ్చే వారిని పరిగణనలోకి తీసుకుని ప్రతి తెల్లరేషన్‌ కార్డుదారుడికి ఏప్రిల్‌ నుంచి సన్న బియ్యం ఇచ్చేందుకు సిద్దమవుతోంది.