ప్రపంచంలోనే ప్రముఖ బ్రాండ్లుగా పేరొందిన ఉత్పత్తులు, సంస్థలు పురుడుపోసుకున్న విధానం.. వాటి అధినేతల అలవాట్లపై ప్రత్యేక కథనం.
⦁ ప్రముఖ శీతలపానీయం కోకా-కోలాను కోకా చెట్టు ఆకులు, కోలా గింజలతో తయారుచేస్తారు. కాబట్టి తమ ఉత్పత్తికి కోకా-కోలా అనే పేరు పెట్టారు.
⦁ సామాజిక మాధ్యమ దిగ్గజం ఫేస్బుక్ గురించి తెలియని వారుండరు. ఆ సంస్థ లోగో నీలి రంగులోనే ఎందుకు ఉంటుందనే సందేహం చాలామంది అడిగారట. అయితే.. తనకు ఎరుపు, పచ్చ రంగులు సరిగా కనిపించవని.. అందుకే నీలి రంగును ఎంచుకున్నట్లు ఫేస్బుక్ వ్యవస్థాపకుడు మార్క్ జుకర్బర్గ్ వెల్లడించారు.
⦁ 'నీకు ట్రాక్టర్ నడపడం వస్తుందేమో కానీ.. కారును మాత్రం ఎప్పటికీ తయారుచేయలేవు' అంటూ అవమానించిన మాటలనే స్ఫూర్తి వాక్యాలుగా తీసుకున్నారో వ్యక్తి. కట్చేస్తే.. ప్రపంచంలోనే అత్యంత విలాసవంతమైన కార్ల తయారీ సంస్థ లాంబోర్గినీని స్థాపించారు. ఆయనే ఫెర్రూసియో లాంబోర్గినీ. అనతికాలంలోనే లగ్జరీ కార్ల తయారీకి పెట్టింది పేరుగా తన సంస్థను మలచి ఖ్యాతికెక్కారు.
⦁ ఫర్నీచర్ రిటైల్ బ్రాండ్లలో రారాజుగా పేరొందింది ఐకియా. స్వీడన్కు చెందిన ఈ సంస్థ ఉత్పత్తులు ఎంత ఫేమస్ అంటే.. ఐరోపాలో జన్మించిన ప్రతి పది మందిలో ఒకరు ఐకియా అమ్మిన పరుపులపైనే జీవం పోసుకున్నారని ఓ అధ్యయనంలో వెల్లడైంది.
⦁ ఇన్స్టంట్ శక్తినిచ్చే ప్రపంచబ్రాండ్ 'న్యూటెల్లా'ను రెండో ప్రపంచ యుద్ధకాలం నాటి పరిస్థితుల్లో తయారుచేశారు. సైనికులకు సరఫరా చేసే కొకోవా నిల్వలు నిండుకోగా.. హెజిల్నట్స్, చక్కెర, కొద్దిపాటి కొకోవాలతో మిశ్రమాన్ని తయారుచేసి వారికి అందించారు. దీనితో సైనికుల ఆకలి బాధను తీర్చారు. అంతేగాక.. కొకోవాను పొదుపుగా వాడుకోవడం మొదలుపెట్టారు.
⦁ 'రూబిక్ క్యూబ్' పజిల్ రూపకర్త ఒక నెలవరకు దానిని పరిష్కరించేందుకు నానా తంటాలు పడ్డారట!
⦁ కోకా-కోలా కంపెనీ ఉత్పత్తుల్లో 'ఫాంటా' ఒకటి. అయితే జపాన్లో ఫాంటాకు విపరీతమైన డిమాండ్ ఉందంట! అక్కడ ఏకంగా 80రకాల ఫ్లేవర్లతో ఈ బ్రాండు అమ్ముడవుతోందంటే ఫాంటాకు ఉన్న క్రేజ్ అర్థం చేసుకోవచ్చు.
⦁ సాంకేతిక దిగ్గజ సంస్థగా పేరొందిన శాంసంగ్ మొదట్లో చిల్లర సరకులు విక్రయించేదంటే మనలో చాలామంది ఆశ్చర్యపోతాం. కానీ.. ఆ సంస్థ ప్రారంభంలో ఎండు చాపలు, కూరగాయలు, నూడుల్స్ వంటి నిత్యావసరాలను విక్రయించేంది. ఆ తర్వాతి కాలంలో ఎలక్ట్రికల్, ఎలక్ట్రానిక్ వస్తువుల నుంచి.. యుద్ధనౌకలు తయారీ వరకు ప్రతిరంగంలో తనదైన ముద్రతో దూసుకుపోతోంది.
⦁ ఆన్లైన్ డేటింగ్ యాప్లలో అత్యంత నమ్మకమైన బ్రాండ్గా 'టిండర్' పేరొందింది. 2014లో అంటార్కిటికాకు చెందిన ఇద్దరు శాస్త్రవేత్తలను తన వేదికపై కలిపి తన ప్రయాణాన్ని ప్రారంభించింది టిండర్.
⦁ చర్మం పగుళ్ల నివారణకు ఉపయోగించే 'వ్యాసెలిన్' గురించి తెలియని వారుండరు. దాదాపు ప్రతి ఇంటిలోనూ కనిపించే ఈ వ్యాసెలిన్ను.. ఆ సంస్థ అధినేత రోబర్ట్ చెస్బ్రో మరణించేవరకు(96) రోజూ ఒక చెంచా తినేవారట!
ఇవీ చదవండి:
