రాబోయే ఆరు నెలల్లో లిథియమ్ అయాన్ బ్యాటరీలను పూర్తి స్థాయిలో ఉత్పత్తి చేయగలగే స్థాయికి భారత్ చేరుకుంటుందని కేంద్ర రోడ్డు, రవాణా శాఖ మంత్రి నితిన్ గడ్కరీ పేర్కొన్నారు. నిర్ణీత సమయంలోగా.. విద్యుత్ వాహన(ఈవీ) తయారీ రంగంలో భారత్ అగ్రగామిగా నిలుస్తుందని చెప్పారు. అమెజాన్ స్మభవ్ సదస్సులో ఆయన వర్చువల్గా పాల్గొన్నారు.
"విద్యుత్ వాహన తయారీ వైపు భారత్ అడుగులు వేస్తోంది. అతిత్వరలోనే.. విద్యుత్ వాహన తయారీ రంగంలో ప్రపంచంలో అగ్రగామిగా నిలుస్తుంది. భారత్లో ఎన్నో ప్రసిద్ధ బ్రాండ్ కంపెనీలు వీటిని తయారు చేయనున్నాయి. హరిత ఇంధనాన్ని ఉత్పత్తి చేయటంలో భారత్కు అద్వితీయమైన సామర్థ్యాలు ఉన్నాయి. ఆరు నెలల్లో లిథియం అయాన్ బ్యాటరీలను 100 శాతం తయారు చేసే స్థాయికి ఎదుగుతుందని నేను విశ్వసిస్తున్నాను."
-నితిన్ గడ్కరీ, కేంద్ర రవాణా శాఖ మంత్రి
హైడ్రోజన్ ఇంధన సాంకేతికను తీసుకువచ్చేందుకు ప్రభుత్వం ప్రణాళికలను రచిస్తోందని గడ్కరీ తెలిపారు. కాలుష్యాన్ని నిరోధించటంలో విద్యుత్ వాహనాల వాడకం కీలక పాత్ర పోషిస్తుందని పేర్కొన్నారు. రాబోయే రెండేళ్లలో విద్యుత్ వాహనాల ధరలు తగ్గి.. డీజిల్, పెట్రోల్ వాహనాల అమ్మకంలో గట్టి పోటీనిస్తాయని చెప్పారు. ఆటోమొబైల్ పరిశ్రమలో భారత్ను ప్రథమ స్థానంలో నిలిపే లక్ష్యంతో.. మిథనాల్, ఇథనాల్, బయో-సీఎన్జీ, విద్యుత్, హైడ్రోజన్ వాహనాల ఉత్పత్తిని ప్రభుత్వం ప్రోత్సహిస్తోందని వెల్లడించారు.
ఇదీ చూడండి: బంగారం దిగుమతులు 22.58 శాతం జంప్
ఇదీ చూడండి: భారీగా తగ్గిన ప్రయాణికుల వాహన ఎగుమతులు
