కరోనా కట్టడికి ప్రస్తుతం దేశవ్యాప్త లాక్డౌన్ కొనసాగుతోంది. ఈ కారణంగా ఆటోమొబైల్ సంస్థల కార్యకలాపాలు పూర్తిగా నిలిచిపోయాయి. అయితే లాక్డౌన్ ఉన్నా విక్రయాలు జరిపేందుకు ఆన్లైన్ వేదికను ఎంచుకుంటున్నాయి పలు సంస్థలు. ప్రముఖ ఆటోమొబైల్ దిగ్గజాలు ఫోక్స్ వ్యాగన్, బీఎండబ్ల్యూ, మెర్సిడెజ్ బెంజ్, హోండా వంటి సంస్థలు ఆన్లైన్లో అమ్మకాలను ప్రారంభిస్తున్నట్లు ప్రకటించాయి.
ఇంటి నుంచి బయటకు రాకుండా.. సురక్షితంగా ఇంట్లో నుంచే నచ్చిన మోడల్ను ఆన్లైన్లో ఆర్డర్ చేసుకోవచ్చని చెబుతున్నాయి ఈ సంస్థలు.
'హోండా ఫ్రం హోం'
ఆన్లైన్లో 'హోండా ఫ్రం హోం' పేరుతో కార్ల విక్రయాలు ప్రారంభించినట్లు హోండా ఇండియా తెలిపింది. వినియోగదారులు సులభంగా నచ్చిన కారును, తమకు అనువైన డీలర్షిప్ నుంచి కోనుగోలు చేసే విధంగా ప్లాట్ఫాంను రూపొందించినట్లు పేర్కొంది.
ఫోక్స్ వ్యాగన్ ..
ఆన్లైన్లో కారు కొనుగోలు చేసిన తర్వాత సురక్షితంగా వినియోగదారుడికి డెలివరీ అయ్యే వరకు సేల్స్ కన్సల్టెంట్లు వీడియో సంభాషణలో అందుబాటులో ఉంటారని ఫోక్స్ వ్యాగన్ ఇండియా తెలిపింది.
దేశవ్యాప్తంగా 137 సేల్స్, 116 సర్వీస్ టచ్పాయింట్లను ఇంటిగ్రేట్ చేసినట్లు తెలిపింది. ఇందులో వినియోగదారులకు అనుకూలమైన డీలర్షిప్ ద్వారా ఆన్లైన్లో నచ్చిన కారును కొనుగోలు చేయొచ్చని పేర్కొంది ఫోక్స్ వ్యాగన్.
లగ్జరీ కార్లు ఆన్లైన్లో కొనొచ్చు..
ఆన్లైన్ ద్వారానే కొత్త కార్లు, సెకండ్ హ్యాండ్ వాహనాలను ఆన్లైన్లో కొనుగోలు చేసేందుకు అవకాశం కల్పిస్తున్నట్లు తెలిపింది లగ్జరీ కార్ల తయారీ సంస్థ బీఎండబ్ల్యూ ఇండియా.
మరో లగ్జరీ కార్ల తయారీ సంస్థ మెర్సిడెజ్ బెంజ్ కూడా 'మెర్స్ ఫ్రం హోం' పేరుతో ఆన్లైన్ విక్రయాలను ప్రారంభించినట్లు ప్రకటించింది.
