లాక్‌డౌన్ నిబంధనల నుంచి ఈ కామర్స్ (అమెజాన్, ఫ్లిప్‌కార్ట్‌, ఇతర) సంస్థలకు ఏప్రిల్ 20 నుంచి ఇవ్వనున్నట్లు చెప్పిన సడలింపులను కేంద్రం ఉపసంహరించుకుంది. ఈ కామర్స్ సంస్థల ద్వారా అత్యవసరం కాని వస్తువుల విక్రయాలపై నిషేధం కొనసాగనున్నట్లు తాజాగా ప్రకటించింది.
అసలు విషయం ఇది..
దేశవ్యాప్తంగా కొనసాగుతున్న లాక్‌డౌన్‌లో రేపటి నుంచి (ఏప్రిల్ 20) కొన్ని సడలింపులు ఉండనున్నట్లు కేంద్రం ఇటీవల మార్గదర్శకాలు జారీ చేసింది. అందులో.. ఈ కామర్స్ సంస్థలు ఏప్రిల్ 20 నుంచి టీవీలు, ఫ్రిడ్జ్‌లు, మొబైల్ ఫోన్లు, ల్యాప్‌టాప్‌లు, దుస్తులు, స్టేషనరీ సామగ్రి వంటి అత్యవసరం కాని వస్తువులనూ విక్రయించుకోవచ్చి పేర్కొంది.
తాజాగా ఆ నిర్ణయాన్ని వెనక్కి తీసుకుంటూ కేంద్ర హోం శాఖ కార్యదర్శి అజయ్‌ భల్లా ఆదేశాలు జారీ చేశారు. ఔషధాలు, వైద్య పరికరాలు, ఆహారపదార్థాలు, ఇతర అత్యవసరాల విక్రయాలు యాథావిధిగా కొనసాగుతాయని స్పష్టం చేశారు.
కారణం అదేనా?
మార్గదర్శకాల అమలుకు ఒక్కరోజు ముందు కేంద్రం యూటర్న్ తీసుకునేందుకు కారణాలు స్పష్టంగా తెలియరాలేదు. కొంత మంది రిటైలర్లు తమకూ ఈ కామర్స్‌లా విక్రయాలు జరిపే అవకాశం ఇవ్వాలని ప్రభుత్వంపై ఒత్తిడి తెచ్చినట్లు తెలుస్తోంది. ఈ నేపథ్యంలో ఈ కామర్స్ సంస్థలకూ సడలింపు రద్దు చేస్తూ కేంద్రం ఈ నిర్ణయం తీసుకున్నట్లు పలువురు అభిప్రాయపడుతున్నారు.
అందరి ఫోన్లలో 'ఆరోగ్య సేతు' యాప్..
ఈ కామర్స సంస్థల్లో పని చేస్తున్న ఉద్యోగులకు సంబంధించి ఆయా సంస్థలకు కేంద్రం కీలక ఆదేశాలు జారీ చేసింది. ఉద్యోగులు భౌతిక దూరం, శానిటైజేషన్ నిబంధనలు తప్పకుండా పాటించేలా చూడాలని స్పష్టం చేసింది. వీటితో పాటు ఉద్యోగులందరూ 'ఆరోగ్య సేతు' యాప్ డౌన్‌లోడ్ చేసుకునేలా చూడాలని తెలిపింది. ఈ కామర్స్ సంస్థల చీఫ్ ఆపరేటింగ్ ఆఫీసర్ (సీఓఓ) వీటన్నింటికీ బాధ్యత వహించాలని స్పష్టం చేసింది.
ఇదీ చూడండి:ఫేస్బుక్లో కొత్త ఎమోజీ... రేపటి నుంచే!
