కరోనా విజృంభణ నేపథ్యంలో ఎన్నో కార్పొరేట్ సంస్థలు.. తమ ఉద్యోగులకు వర్క్ ఫ్రమ్ హోం అవకాశం కల్పించాయి. ప్రముఖ టెక్‌ దిగ్గజం గూగుల్.. ఓ అడుగు ముందుకేసి కొత్తగా హైబ్రిడ్ వర్క్ వీక్ను అమలు చేస్తోంది. ఇందులో భాగంగా తమ ఉద్యోగులు.. 3 రోజులు ఆఫీస్కు రావాల్సి ఉంటుంది. మిగతా రెండు రోజులు ఉద్యోగుల నిర్ణయానికే వదిలేసినట్లు గూగుల్, అల్ఫాబెట్ సీఈఓ సుందర్ పిచాయ్ స్పష్టం చేశారు.
ఆ రెండు రోజులు.. ఉద్యోగులకు ఇష్టమొచ్చిన, సౌకర్యంగా ఉన్న చోటు నుంచి చేయొచ్చని ఓ ప్రకటనలో తెలిపారు.
ఆఫీసులు తెరుచుకున్నా అవకాశం..
కరోనా తగ్గుముఖం పట్టి ఈ ఏడాది చివరికల్లా తమ కార్యాలయాలు తెరిచినా.. 20 శాతం మంది వర్క్ ఫ్రమ్ హోం చేస్తారని, 60 శాతం మందికి 'హైబ్రిడ్ వర్క్ వీక్' అవకాశం ఉంటుందని వెల్లడించారు.
2021 మొదటి త్రైమాసిక గణాంకాల ప్రకారం.. ప్రపంచవ్యాప్తంగా గూగుల్లో 1,39,995 మంది పూర్తిస్థాయి(ఫుల్టైం) ఉద్యోగులు ఉన్నారు. ఏ దేశంలో ఎంతమంది తమ ఉద్యోగులు ఉన్నారో గూగుల్ చెప్పకపోయినా.. భారత్లో సుమారు 4 వేల మంది ఉంటారని అంచనా.
సర్చ్‌, క్లౌడ్‌, పేమెంట్స్‌, కృత్రిమ మేధ పరిశోధన విభాగాల్లోనే భారత్కు చెందిన నిపుణులు ఉన్నారు. బెంగళూరు, హైదరాబాద్‌, ముంబయి, గురుగ్రామ్‌లో ఎక్కువమంది పనిచేస్తున్నారు.
ఇదీ చూడండి: ఎల్ఐసీ పని దినాలు ఇక వారంలో ఐదే!
