గూగుల్ తన వీడియో కాన్ఫరెన్సింగ్ యాప్ 'మీట్'ను ఉచితంగా అందిస్తోంది. ఈ-మెయిల్ అడ్రస్ ఉన్న ఎవరైనా సైన్ అప్ చేసి.. మీట్.గూగుల్.కామ్ ద్వారా యాప్ సేవలను పొందవచ్చు.
జీ సూట్ వైస్ ప్రెసిడెంట్, జీఎమ్ జేవియర్ సోల్టెరో ప్రకారం.. ప్రజలు త్వరలో తమ జీ-మెయిల్ ఖాతాల ద్వారా మీట్ యాప్ సేవలను పొందగలుగుతారు.
30 రెట్లు పెరిగిన వినియోగం...
జీ సూట్, జీ సూట్ ఎడ్యుకేషన్ వినియోగదారుల కోసం మీట్ యాప్ను సరికొత్త ఫీచర్లతో ఆధునీకరించారు. ఇది ఈ మార్చి నెలలో అందుబాటులోకి వచ్చింది. అప్పటి నుంచి ఈ మీట్ యాప్ రోజువారీ వినియోగం 30శాతం పెరిగిందని గూగుల్ ట్వీట్ చేసింది.
మీట్ యాప్... ప్రతిరోజూ 3 బిలియన్ నిమిషాల వీడియో సమావేశాలు నిర్వహిస్తోంది. గత నెలలో ప్రతి రోజూ సుమారు 3 మిలియన్ల మంది మీట్ యాప్ ఖాతాదారులుగా మారిపోయారు. అందుకే ఈ యాప్ను ప్రపంచవ్యాప్తంగా మరింత మందికి చేరువ చేసేందుకు గూగుల్ సమాయత్తమవుతోంది.
ఇలా పనిచేస్తుంది...
గూగుల్ మీట్ యాప్ ఓపెన్ చేసి 'స్టార్ట్ ఏ మీటింగ్'ని క్లిక్ చేయాలి. అప్పుడు ప్రత్యేకమైన, సురక్షితమైన మీటింగ్ విండో ఓపెన్ అవుతుంది. తరువాత మీరు ఇతరులకు 'మీటింగ్ కోడ్' పంపి... సమావేశంలో చేరమని ఆహ్వానించవచ్చు. దీని తరువాత మీరు వీడియో సమావేశాలను ప్లాన్ చేయవచ్చు. గూగుల్ క్యాలెండర్ నుంచి నేరుగా ఇతరులను ఆహ్వానించవచ్చు.
మీట్లో సరళమైన షెడ్యూలింగ్, స్క్రీన్ షేరింగ్, రియల్ టైమ్ క్యాప్షన్స్, లేఅవుట్, టైల్డ్-వ్యూ ఆప్షన్స్ ఉన్నాయి. ఇది చాలా సురక్షితమైనది. ఇది ఐఓఎస్, ఆండ్రాయిడ్ వినియోగదారులకు పూర్తి ఉచితంగా లభిస్తోంది.
ఇదీ చూడండి: ట్విట్టర్ ఉద్యోగులు ఇక శాశ్వతంగా ఇంటి నుంచే!
