ముకేశ్ అంబానీకి చెందిన రిలయన్స్ జియోలోకి విదేశీ సంస్థల పెట్టుబడుల ప్రవాహం కొనసాగుతోంది. తాజాగా అమెరికాకు చెందిన జనరల్ అట్లాంటిక్.. జియో ప్లాట్పామ్ల్లో రూ. 6,598.38 కోట్లు పెట్టుబడి పెట్టడానికి నిశ్చయించింది. ఫలితంగా ఆ సంస్థ 1.34 శాతం వాటాను దక్కించుకోనుంది. ఆసియాలో ఆ సంస్థ పెట్టిన అతి పెద్ద పెట్టుబడి ఇదే.
జియోలో ఇప్పటికే ఫేస్బుక్, సిల్వర్ లేక్ పార్టనర్స్ , విస్టా లాంటి సంస్థలు భారీ పెట్టుబడులు పెట్టగా... తాజాగా జనరల్ అట్లాంటిక్ ఈ జాబితా చేరింది.
జియోలో ఫేస్బుక్ రూ.43,574 కోట్లతో 9.99 శాతం వాటా, సిల్వర్ లేక్ రూ.5,655.75 కోట్లతో 1.15 శాతం వాటా, విస్టా రూ.11,367 కోట్లతో 2.3 శాతం వాటాను కొనుగోలు చేశాయి. ఇప్పటి వరకు జియో రూ.67,194.75 కోట్ల పెట్టుబడులను సమీకరించగలిగింది. ఈ పెట్టుబడులు నెక్స్ట్ జెనరేషన్ సాఫ్ట్వేర్ ప్రొడక్ట్, ప్లాట్ఫాం కంపెనీగా జియోను తీర్చిదిద్దుతాయని కంపెనీ ఓ ప్రకటనలో తెలిపింది.
ఇదీ చూడండి: దేశంలో 13.6 కోట్ల ఉద్యోగాలకు కరోనా గండం
