గతంలో వివాదాస్పదంగా మారిన ఫేస్బుక్ పబ్లిక్ పాలసీని తిరిగి పునరుద్ధరించే దిశగా ఆ సంస్థ అడుగులు వేసింది. ప్రజా సంబంధ వ్యవహారాలపై సుదీర్ఘ అనుభవం ఉన్న మాజీ ఐఏఎస్ అధికారి రాజీవ్ అగర్వాల్ను పబ్లిక్ పాలసీ హెడ్గా నియమించింది. గతంలో ఆయన ఊబర్కు పబ్లిక్ పాలసీ హెడ్గా పనిచేశారు.
ఫేస్బుక్ భారత పబ్లిక్ పాలసీ హెడ్ పదవి నుంచి అంఖీ దాస్ గతేడాది అక్టోబర్లో తప్పుకున్నారు. నాయకుల విద్వేషపూరిత ప్రసంగాలు, కంటెంట్ నిర్వహణ విషయంలో ఫేస్బుక్ తీవ్ర ఆరోపణలు ఎదుర్కొంది. ఈ నేపథ్యంలో రాజీనామా చేసిన దాస్ స్థానంలో రాజీవ్ను నియమించినట్లు ఫేస్బుక్ ఇండియా ఎండీ అజిత్ మోహన్ తెలిపారు.
వినియోగదారుల భద్రత, సమాచార రక్షణ, గోప్యత, ఇంటర్నెట్ గవర్నెన్స్లకు సంబంధించిన అజెండాను భారత్లో అభివృద్ధి చేయడానికి రాజీవ్ కృషి చేస్తారని పేర్కొన్నారు. ఐఎఎస్ ఆఫీసర్గా సుమారు 26 ఏళ్ల అనుభవం ఉన్న రాజీవ్ ఉత్తర్ప్రదేశ్లోని 9 జిల్లాల్లో జిల్లా మేజిస్ట్రేట్గా పనిచేశారు. భారతదేశపు మొట్టమొదటి జాతీయ-మేధో సంపత్తి హక్కుల విధానంలో మినిస్ట్రీ ఆఫ్ కామర్స్కు సంయుక్త కార్యదర్శిగా పని చేశారు. డిజిటల్ ట్రాన్స్ఫర్మేషన్ ఆఫ్ ఇండియాలో ఆయన కీలక పాత్ర పోషించారు.
ఇదీ చూడండి: ఐటీ ఉద్యోగం కావాలా? ఆన్లైన్లో ఈ పరీక్ష రాసేయండి!
