రండి.. నిదురపొండి అంటుంది ఓ ఇండియన్‌ స్టార్టప్‌. నిద్ర ప్రేమికుల కోసమే ఈ ఇంటర్న్‌ షిప్‌ అంటూ ఓ భారీ ఆఫర్‌ను ప్రకటించింది. ఇక్కడ మీరు చేయాల్సిందల్లా కేవలం నిద్రపోవడమే. ఈ మేరకు బెంగళూరుకు చెందిన ఫోమ్‌ పరుపుల తయారీ సంస్థ ‘వేక్‌ఫిట్‌’ ఒక ఇంటర్న్‌షిప్‌ కార్యక్రమాన్ని ప్రకటించింది. ఎంపికైన అభ్యర్థులు ఈ సంస్థ రూపొందించిన పరుపులపై నిద్రించాల్సి ఉంటుంది. ఈ సంస్థ తమ వెబ్‌సైట్‌లో ఈ ఆఫర్‌ను ప్రకటించి ఆసక్తి గల అభ్యర్థులను నమోదు చేసుకోవాలని తెలిపింది.
ప్రతి రాత్రి 9 గంటల పాటు చక్కగా పరుపుపై విశ్రమించాల్సి ఉంటుంది. ఇలా 100 రోజులు చేస్తే రూ.లక్ష ఇస్తారు. ఇంటర్న్‌షిప్‌ పరుపులను ఉపయోగించక ముందు, ఆ తర్వాత వారిలో నిద్ర తీరుతెన్నులను 'స్లీప్‌ ట్రాకర్ల'తో నమోదు చేస్తారు.
''మెరుగ్గా నిద్రించేలా ప్రజల్లో స్ఫూర్తి నింపడమే మా ఉద్దేశం. నేటి ప్రపంచంలో విశ్రమించడం తగ్గిపోతోంది. దీని ప్రభావం ఆరోగ్యం, ఉత్పాదకత, జీవన నాణ్యతపై పడుతోంది.''
- చైతన్య రామలింగేగౌడ, వేక్‌ఫిట్‌ డైరెక్టర్‌
దేశంలోని అత్యంత బాగా నిద్రపోయే వారిని తాము రిక్రూట్‌ చేయాలనుకుంటున్నట్లు తెలిపారు చైతన్య.
