కరోనా.... యావత్ ప్రపంచాన్ని గడగడలాడిస్తోన్న మహమ్మారి. వైరస్ గురించి ప్రజల్లో నెలకొన్న భయాల్ని సొమ్ము చేసుకునే ప్రయత్నం చేస్తున్నారు కొందరు సైబర్ నేరగాళ్లు. కొత్త రకం మోసాలతో జనాల్ని బుట్టలో పడేసి డబ్బులు దండుకుంటున్నారు. ఈ కష్టకాలంలో అలాంటి మోసగాళ్ల బారిన పడకుండా ఉండడం ఎంతో కీలకం.
కరోనా కాలంలో సరికొత్త మోసాలు:
ఆన్లైన్ మోసం: సైబర్ దొంగలు నకిలీ వైబ్సైట్లు, ఈ-కామర్స్ ప్లాట్ఫామ్స్, సోషల్ మీడియా ఖాతాలు, ఈమెయిల్స్ సృష్టిస్తారు. ఔషధాలు, వైద్య సామగ్రి పంపుతామని నమ్మబలుకుతారు. ఆన్లైన్ ద్వారా డబ్బులు చెల్లించమని అడుగుతారు.
టెలిఫోన్ ఫ్రాడ్: "మా బంధువు ఒకరికి కరోనా సోకింది. ఆస్పత్రిలో చేర్చాం. చికిత్స కోసం డబ్బులు కావాలి. మీరు సాయం చేయండి" అని అబద్ధం చెప్పి డబ్బులు కాజేస్తారు.
ఫిషింగ్: మోసగాళ్లు... తాము ఆరోగ్యశాఖ అధికారులమని చెప్పుకుంటూ వైరస్ గురించి మెయిల్స్ పంపుతారు. అందులో నకిలీ వెబ్సైట్ల లింక్లు పెడతారు. ఈమెయిల్ ఐడీ, పాస్వర్డ్తో లాగిన్ అవ్వమని చెబుతారు. తెలియక లాగిన్ అయితే.. ఆ వివరాలు తస్కరిస్తారు. మన బ్యాంకు ఖాతాల నుంచి డబ్బు దోచుకుంటారు.
ఈ జాగ్రత్తలు తప్పనిసరి:
- అనుమానాస్పద ఈమెయిల్స్ ఓపెన్ చేయకండి. కరోనా వైరస్ గురించి అంటూ వచ్చే లింకులు, సోషల్ మీడియా మెసేజ్లకు దూరంగా ఉండండి.
- సోషల్ మీడియా, బ్యాంకు ఖాతాలకు స్ట్రాంగ్ పాస్వర్డ్లు, మల్టీ లెవల్ అథెంటికేషన్ ఆప్షన్ పెట్టుకోండి.
- మీ సాఫ్ట్వేర్ ఎప్పటికప్పుడు అప్డేట్ చేసుకోండి. యాంటీ వైరస్ సాఫ్ట్వేర్ ఉపయోగించండి.
- ఆన్లైన్లో సమాచార భద్రత గురించి మీ కుటుంబ సభ్యులు, ముఖ్యంగా మీ పిల్లలకు చెప్పండి.
- స్వచ్ఛంద సంస్థలకు విరాళాలు ఇచ్చే ముందు ఒకటికి రెండు సార్లు వివరాలు సరిచూసుకోండి.
- సైబర్ మోసం బారిన పడితే తక్షణమే పోలీసులను సంప్రదించండి.
