కరోనాపై భారత్ చేస్తున్న పోరాటానికి దేశంలోని బడా కంపెనీలు అండగా నిలుస్తున్నాయి. 400 ఆక్సిజన్ తయారీ యూనిట్లను ఏర్పాటు చేసేందుకు విదేశాల్లో ఉన్న 60 క్రయోజెనిక్ ఆక్సిజన్ ట్యాంకర్లను విమానాల ద్వారా భారత్కు తీసుకువచ్చేందుకు టాటా గ్రూప్ సన్నాహాలు చేస్తోంది. వీటి ద్వారా తయారు చేసిన ఆక్సిజన్‌ను చిన్న పట్టణాల్లోని ఆసుపత్రులకు అందజేస్తామని టాటా గ్రూప్ తెలిపింది.
టాటా గ్రూప్ కంపెనీలతో కలిసి కొవిడ్ రోగుల కోసం సుమారు 5,000 పడకలను ఏర్పాటు చేస్తామని టాటా సన్స్కు చెందిన ఓ సీనియర్ అధికారి ఒకరు తెలిపారు. సంస్థలోని కొంత మంది ఉద్యోగులకు ఇందుకు సంబంధించిన శిక్షణ ఇచ్చి...భారత్లోని కొన్ని హోటళ్లను కరోనా కేంద్రాలుగా మార్చినట్లు చెప్పారు. దీంతో రోగులకు మరిన్ని పడకలను అందుబాటులోకి తీసుకురావచ్చని వివరించారు. ఇందుకోసం రక్షణ పరిశోధన అభివృద్ధి సంస్థ(డీఆర్డీఓ)తో ఒప్పందం కుదుర్చుకున్నట్లు పేర్కొన్నారు.
ఆక్సిజన్ సరఫరా పెంపు..
కరోనా రోగుల చికిత్స కోసం వినియోగించే ఆక్సిజన్ రోజువారీ సరఫరాను 1,000 టన్నులకు పెంచుతున్నట్లు టాటా స్టీల్ తెలిపింది. జెంషెడ్పుర్, కళింగనగర్లోని ప్లాంట్ల నుంచి ఆక్సిజన్ సరఫరా పరిమితిని రోజుకు 600 టన్నుల నుంచి 800 టన్నులకు పెంచినట్లు పేర్కొంది. ఈ మేరకు ట్వీట్ చేసింది.
ఇదీ చూడండి: కరోనాపై పోరులో కార్పొరేట్ల సాయం
