గుజరాత్, అసోం, తమిళనాడు, తెలంగాణ, కర్ణాటక, ఒడిశా రాష్ట్రాలకు నేరుగా కరోనా టీకా కొవాగ్జిన్ డోసులను సరఫరా చేసినట్లు భారత్ బయోటెక్ శుక్రవారం ప్రకటించింది. పవిత్ర రంజాన్ మాసంలోనూ ఇందుకోసం కృషి చేసిన తమ ఉద్యోగులందరికీ ట్విట్టర్ ద్వారా అభినందనలు తెలిపారు భారత్ బయోటెక్ సహ వ్యవస్థాపకురాలు, ఎండీ సుచిత్ర ఎల్లా.
దిల్లీ ప్రభుత్వంతో సరఫరా సంబంధిత సమస్యల నేపథ్యంలో కొవాగ్జిన్ లాట్లను కేరళ, ఉత్తరాఖండ్కు పంపినట్లు కూడా పేర్కొన్నారు సుచిత్రా ఎల్లా. అయితే ఏ రాష్ట్రానికి ఎన్ని డోసులు సరఫరా చేసిన విషయాన్ని మాత్రం వెల్లడించలేదు.
పుణె ప్లాంట్లో ఆగస్టు నాటికి ఉత్పత్తి..
బయోవెట్ ప్రైవేట్ లిమిటెడ్కు పుణెలో ఉన్న ప్లాంట్ను కొవాగ్జిన్ తయారీకి ఉపయోగించుకునేందుకు భారత్ బయోటెక్కు అప్పగించాలని బాంబే హైకోర్టు తీర్పునిచ్చిన నేపథ్యంలో.. పుణె డివిజినల్ కమిషనర్ సురభ్ రావ్, జిల్లా కలెక్టర్ రాజేశ్ దేశ్ముఖ్లు ప్లాంట్ను సందర్శించారు. ఈ ప్లాంట్లో ఈ ఏడాది ఆగస్టు చివరి నాటికి పూర్తి స్థాయిలో కొవాగ్జిన్ ఉత్పత్తి జరిగేందుకు అవకాశముందని వెల్లడించారు.
ఇదీ చదవండి:కుటుంబ పత్రం..రాసి పెట్టుకున్నారా?
