ఈ-కామర్స్ దిగ్గజాలు అమెజాన్, ఫ్లిప్కార్ట్లపై కాంపిటిషన్ కమిషన్ అఫ్ ఇండియా (సీసీఐ) దర్యాప్తునకు ఆదేశించింది. భారీ రాయితీలు ప్రకటించడం, తమ వేదికలపై ఎంచుకున్న అమ్మకందార్లతో కుమ్మక్కు అవుతున్నారన్న ఆరోపణలపై విచారణ చేపట్టనున్నట్లు పేర్కొంది. అమ్మకాలు చట్టాన్ని ఉల్లంఘిస్తే కఠిన చర్యలు తప్పవని హెచ్చరించింది.
'నిబంధనలను ఉల్లంఘిస్తున్నాయ్'
ఈ కామర్స్ సంస్థలు నిబంధనలను ఉల్లంఘిస్తున్నాయని ఆరోపిస్తూ 'దిల్లీ వ్యాపార్ మహాసంఘ్' దాఖలు చేసిన ఫిర్యాదు మేరకు సీసీఐ ఈ చర్యలు చేపట్టింది. దిల్లీ వ్యాపార్ సంఘ్లో అనేక మంది స్మార్ట్ఫోన్, దాని సంబంధిత ఉపకరణాలు విక్రయించేవారు అధికంగా ఉన్నారు.
ఈ-కామర్స్ సంస్థలు ప్రిఫరెన్షియల్ లిస్టింగ్, ఎక్స్క్లూజివ్ టై-అప్స్, ప్రైవేట్ లేబుల్స్ వంటి పద్ధతులు అవలంభిస్తున్నాయని దిల్లీ వ్యాపార్ మహాసంఘ్ ఆరోపించింది. ఇవి ఆరోగ్యకరమైన వ్యాపార పద్ధతులకు పూర్తిగా విరుద్ధమని పేర్కొంది.
అమెజాన్ స్పందన
సీసీఐ ఉత్తర్వులపై అమెజాన్ ఇండియా ప్రతినిధి స్పందించారు. తమపై తమకు నమ్మకముందని, సీసీఐతో పూర్తిగా సహకరిస్తామని ఆయన అన్నారు.
యాదృచ్ఛికం: అమెజాన్ వ్యవస్థాపకుడు జెఫ్ బెజోస్ ఈ వారంలోనే భారత్ను సందర్శించే అవకాశం ఉంది.
ఫ్లిప్కార్ట్ స్పందన
సీసీఐ ఉత్తర్వులను సమీక్షిస్తున్నట్లు ఫ్లిప్కార్ట్ ప్రతినిధి తెలిపారు. వ్యాపార చట్టాలను, ఎఫ్డీఐ నిబంధనలను ఫ్లిప్కార్ట్ పూర్తిగా అనుసరిస్తోందని పేర్కొన్నారు. ఎంఎస్ఎంఈలు, అమ్మకందార్లు, చేతివృత్తులవారు, చిన్నవ్యాపారులకు తమ వేదిక ద్వారా అవకాశం కల్పించామన్నారు. నాణ్యమైన వస్తువులను సరసమైన ధరలకు వినియోగదారులకు అందిస్తున్నందుకు గర్వపడుతున్నామన్నారు. పారదర్శకంగా వ్యాపారం చేస్తూ లక్షలాది ఉద్యోగాలను కల్పించామని ఆయన తెలిపారు.
ఇదీ విషయం
ఈ కామర్స్ సంస్థలకు రాయితీలు, ఉద్దేశపూర్వక ధరలతో అమ్మడానికి ఎలాంటి హక్కు లేదు. అంతేకాదు వాళ్లు సొంతంగా ఉత్పత్తులను కలిగి ఉండేందుకూ వీలులేదు. కేవలం ఉత్పత్తి సంస్థలతో వినియోగదారునికి అనుసంధానం చేయటమే వాళ్ల పని. తక్కువ ధరలకు ఉత్పత్తులను అమ్మడం వల్ల వర్తక రంగానికి నష్టాలు వచ్చి అవి దెబ్బతింటాయి.
ఇదీ చూడండి: సీఎండీ పదవీ విభజన గడువు రెండేళ్లు పొడిగింపు: సెబీ
