దేశవ్యాప్తంగా మంగళవారం నుంచి వాట్సాప్లో వంటగ్యాస్ బుకింగ్ సేవలను ప్రారంభించినట్లు తెలిపింది భారత్ పెట్రోలియం కార్పొరేషన్ లిమిటెడ్(బీపీసీఎల్). రిజిస్టర్ అయిన కస్టమర్లు 1800224344 నంబర్కు మెసేజ్ చేసి ఈ సదుపాయాన్ని పొందవచ్చని ప్రకటనలో పేర్కొంది. వినియోగదారులకు మరింత చేరువయ్యేందుకే ఈ కొత్త సేవలను అందుబాటులోకి తీసుకొచ్చినట్లు స్పష్టం చేసింది.
భారత్లో రెండో అతిపెద్ద చమురు సంస్థ అయిన బీపీసీఎల్కు 7.1కోట్ల మంది వినియోగదారులున్నారు. వాట్సాప్ను యువత, వృద్ధులు సహా దాదాపు ప్రతి ఒక్కరు వినియోగిస్తున్నారని, వంటగ్యాస్ బుకింగ్ను మరింత సులభతరం చేసేందుకే ఈ నిర్ణయం తీసుకున్నట్లు సంస్థ మార్కెటింగ్ డైరెక్టర్ అరుణ్ సింగ్ తెలిపారు.
వాట్సాప్లో బుకింగ్ చేసుకున్న భారత్ గ్యాస్ వినియోగదారులకు కన్ఫర్మేషన్ మెసేజ్ వస్తుంది. దానితో పాటు పేమెంట్ చేయాల్సిన లింక్ ఉంటుంది. క్రెడిట్ కార్డు, డెబిట్ కార్డు, యూపీఐల ద్వారా చెల్లింపు పూర్తి చేయవచ్చు. కొత్తగా ట్రాకింగ్ సదుపాయంతో పాటు, కస్టమర్ల నుంచి ఫీడ్బ్యాక్ తీసుకోనున్నట్లు సింగ్ చెప్పారు.
ఐవీఎస్ఆర్, మిస్డ్ కాల్, యాప్, వెబ్సైట్ ద్వారా ఇప్పటికే బుకింగ్ సదుపాయాన్ని కల్పిస్తోంది బీపీసీఎల్. ఇప్పుడు కొత్తగా వాట్సాప్ బుకింగ్ను ప్రారంభించింది.
