కరోనా నేపథ్యంలో ఇటీవల ఇంటర్నెట్ వినియోగం విపరీతంగా పెరిగిపోయింది. చాలా మంది ఇళ్లకే పరిమితమైన నేపథ్యంలో ఆన్లైన్ ద్వారానే అన్ని అవసరాలు తీర్చుకుంటున్నారు. ముఖ్యంగా కరోనాకు ముందు నగదు ద్వారానే లావాదేవీలు జరిపిన వారు కూడా.. ఆన్లైన్కు మారారు. అయితే దీన్ని అదనుగా చేసుకుని సైబర్ నేరగాళ్లు భారీ ఎత్తున మాల్వేర్లతో దాడులకు పాల్పడొచ్చని నిఘా వర్గాలు అంచనా వేస్తున్నాయి.
హెచ్చరిక..
ఇండియన్ కంప్యూటర్ ఎమర్జన్సీ రెస్పాన్స్ టీమ్ (సెర్ట్-ఇన్) కూడా భారీగా సైబర్ దాడులు జరగొచ్చని ఇటీవల హెచ్చరించింది. ఫిషింగ్ ఎటాక్ రూపంలో ఈ దాడి ఉంటుందని తెలిపింది.
ఈ నేపథ్యంలో సురక్షితంగా డిజిటల్ పద్ధతిలో లావాదేవీలు చేయటంపై రిజర్వు బ్యాంకు కూడా మార్గదర్శకాలు విడుదల చేసింది. బ్యాంకులు కూడా వినియోగాదారులను జాగ్రత్తగా ఉండాలని సూచిస్తూ తరచూ సందేశాలను పంపిస్తున్నాయి.
సింగపూర్కు చెందిన సైఫార్మా అనే సంస్థ కూడా భారతదేశంలో ఫిషింగ్ ఎటాక్ జరగవచ్చని తెలిపింది. ఉత్తర కొరియాకు చెందిన లాజరస్ అనే హ్యాకర్స్ గ్రూప్... భారతదేశంతో సహా ఆరు దేశాలపై ఈ దాడులు చేయనుందని ఈ సంస్థ నివేదిక పేర్కొంది.
హ్యాకర్ల చేతిలో 20 లక్షల ఈ మెయిళ్లు..
సాధారణ ఈ-మెయిల్ లానే ఉండి దాన్ని క్లిక్ చేస్తే వేరే సైట్ తెరుచుకుని మీ వివరాలు సేకరించేందుకు ఉపయోగపడే వాటిని ఫిషింగ్ మెయిల్స్ అంటారు. ప్రభుత్వం నుంచి ఆర్థిక సహాయం అందించేందుకు వచ్చినట్లు, ఇతర సంస్థల నుంచి పంపినట్లు ఈ మెయిల్లు భారతీయులకు పంపేందుకు హ్యాకర్లు ప్రయత్నిస్తున్నట్లు సైఫార్మా తెలిపింది.
సైఫార్మా తెలిపిన వివరాల ప్రకారం దాదాపు 20 లక్షలకుపైగా భారతీయుల ఈ మెయిళ్లు హ్యాకర్ల చేతిలో ఉన్నాయి. ముఖ్యంగా హైదరాబాద్, దిల్లీ, ముంబయి, చెన్నై, అహ్మదాబాద్ నగరాలపై సైబర్దాడుల ప్రమాదం ఎక్కువగా ఉంది.
ఫిషింగ్ మెయిళ్లను గుర్తించండిలా..
- ఎవరికైనా ఈ మెయిల్ వస్తే అది ఫిషింగ్ మెయిలా? లేదా నిజమైనదేనా అనే కొన్ని జాగ్రత్తల ద్వారా తెలుసుకునే వీలుంది.
- కంపెనీలు లేదా ప్రభుత్వం ఏదైనా ఈ మెయిల్ పంపితే వాటి ద్వారా ఎలాంటి సున్నితమైన సమాచారాన్ని అవి కోరవు.
- కంపెనీలు తమ డొమైన్ పేరు మీద ఉన్న మెయిల్ అడ్రసు నుంచి మాత్రమే మెయిల్ పంపిస్తాయి. ఇవి దాదాపు వినియోగదారుడి పేరుతోనే సంబోధిస్తాయి. అడ్రస్లో హెచ్‌టీటీపీఎస్ అని ఉంటుంది. వీటికి వ్యతిరేకంగా ఉన్నట్లైతే అది ఫిషింగ్ మెయిల్ అవ్వొచ్చు.
- మెయిల్ అడ్రస్, వెబ్ సైట్ అడ్రస్ను జాగ్రత్తగా పరిశీలించండి. ఒక్క అక్షరం తేడా ఉన్న అది ఫిషింగ్ మెయిలే అని నిర్ధరించుకోండి.
- కొన్ని ఫైల్స్ ద్వారా వైరస్ మన కంప్యూటర్‌లో ప్రవేశించే ప్రమాదం ఉంది. జిప్, ఈఎక్స్‌ఈ, ఎస్‌సీఆర్‌ లాంటి ఎక్స్‌టెన్షన్ ఉన్న అటాచ్‌మెంట్లలో వైరస్ ఉండేందుకు ఉండే అవకాశాలు ఉంటాయి. వాటి పట్ల జాగ్రత్త వహించండి.
ఫిషింగ్ పట్ల తీసుకోవాల్సిన జాగ్రత్తలు
- ఈ మెయిల్ తెలిసిన ఆధారాల నుంచి వచ్చినట్లు అనిపించినా.. వాటిలో అటాచ్ అయ్యి వచ్చిన ఫైళ్లను ఓపెన్ చేసేటప్పుడు జాగ్రత్త వహించండి. తెలిసిన వ్యక్తులు, సంస్థల నుంచి ఒకవేళ మీరు అడగకుండానే ఏదైనా మెయిల్ వస్తే.. వాటి అటాచ్మెంట్ల పట్ల కూడా జాగ్రత్త వహించండి. ఇలాంటి వాటిలో లింకులను ఎట్టి పరిస్థితుల్లోనూ క్లిక్ చేయొద్దు.
- కరోనా వల్ల ఏర్పడిన పరిస్థితులను సైబర్ దాడులకు ఉపయోగించే అవకాశం ఉంది. ఇంటి నుంచి పనిచేస్తున్న బీమా ఏజెంట్లు, బ్యాంకు ప్రతినిధులమని చెప్పుకునే వారి నుంచి వచ్చే ఫోన్లను పట్టించుకోకపోవటమే ఉత్తమమని నిపుణులు సూచిస్తున్నారు.
- ఆన్లైన్ నగదు బదిలీలు, కొనుగోళ్లకు సంబంధించిన జాగ్రత్తలు తీసుకోవాలి. చెల్లించే అకౌంట్ నంబర్ సరైనదా కాదా అనేది చెక్ చేసుకోవాలి.
- ఆన్లైన్ కొనుగోళ్లు నమ్మదగిన సైట్ల నుంచి మాత్రమే చేయండి.
- యూజర్ ఐడీ, పాస్ వర్డ్‌ల వంటి సున్నితమైన సమాచారాన్ని ఎవరికీ చెప్పొద్దు. కంపెనీ ప్రతినిధులమని చెప్పుకునే వారికి, వివిధ వెబ్ సైట్లకు కానీ ఈ వివరాలను తెలియజేయవద్దు.
- చూసేందుకు నిజమే అనిపించే ఆఫర్లను ఒకటికి రెండు సార్లు తనిఖీ చేసుకొండి. అనుమానం ఉన్న వాటిని సైబర్ క్రైమ్ దృష్టికి తీసుకెళ్లండి.
ఇదీ చూడండి:అంతరిక్ష రంగంపై అంకురాల ఆసక్తి
