ఇటీవల ఆన్లైన్ ప్రైవసీపై ఆందోళనలు పెరుగుతున్న నేపథ్యంలో ఆండ్రాయిడ్ యూజర్లకు మరో కొత్త ఫీచర్ అందుబాటులోకి వచ్చింది. ఆండ్రాయిడ్ మెసేజ్ యాప్ను ఎండ్ టూ ఎండ్ ఎన్క్రిప్టెడ్గా అప్డేట్ చేసింది. దీనితో ఏ ఇద్దరి మధ్య జరిగిన సందేశాలను ఇతరులెవ్వరూ చదవలేరు. నిజానికి ఈ ఫీచర్ను గత ఏడాది బీటా యూజర్లకు అందుబాటులోకి తెచ్చింది ఆండ్రాయిడ్. తాజాగా దీనిని ఇతర యూజర్లు వినియోగించేలా అప్ డేట్ ఇచ్చింది.
''మెసేజ్ ఎండ్ టు ఎండ్ ఎన్క్రిప్షన్తో మీరు సందేశాలు పంపించుకోవడం.. మరింత సురక్షితం. ఈ మెసేజ్లోని కంటెంట్.. పంపే మీకు, పంపాల్సినవారికి తప్ప ఎవరికీ కనిపించదని హామీ ఇస్తున్నాం.''
- ఆండ్రాయిడ్ అధికారిక వెబ్సైట్లో ప్రకటన
ఇద్దరి మధ్య సందేశాలు మూడో పార్టీ గానీ, గూగుల్ కానీ యాక్సెస్ చేయలేదు. ఎన్క్రిప్షన్ మోడ్ను యాక్టివ్ చేసుకోవడం మాత్రం తప్పనిసరి. మొదటగా.. చాట్ ఫీచర్స్ను ఎనేబుల్ చేసుకుంటేనే ఎండ్ టు ఎండ్ ఎన్క్రిప్షన్ పనిచేస్తుంది. సెండ్ బటన్ వద్ద లాక్ ఐకాన్ కనిపిస్తే ఆ మెసేజ్ ఎన్క్రిప్టెడ్ అని అర్థం.
ఎనేబుల్ చేయడం ఎలా?
- మొదటగా గూగుల్ మెసేజెస్ యాప్ డౌన్లోడ్ చేసుకుని ఓపెన్ చేయండి.
- పైన కుడివైపు హామ్బర్గర్ మెనూను ట్యాప్ చేయాలి.
- అక్కడ సెట్టింగ్స్లోకి వెళ్లాలి.
- చాట్ ఫీచర్స్ను సెలక్ట్ చేసి.. 'యస్, ఐయామ్ ఇన్'ను ట్యాప్ చేయాల్సి ఉంటుంది.
- గూగుల్ మెసేజెస్కు అనుసంధానం చేసిన మీ ఫోన్ నెంబర్ను ఎంటర్ చేయాలి.
- ధ్రువీకరణ పూర్తయ్యాక.. మీరు ఆ చాట్ ఫీచర్స్ను ఉపయోగించుకోవచ్చు.
కొత్త ఫీచర్లు..
ప్రైవసీకి భద్రత కల్పించడమే కాకుండా.. వాట్సాప్ తరహాలో మరిన్ని ఫీచర్లనూ అందుబాటులోకి తీసుకొచ్చింది. అవేంటంటే..
- మొబైల్ డేటా, వైఫైతోనూ మెసేజ్లు పంపించుకోవచ్చు.
- గ్రూపుల్లోనూ సంభాషణలు జరపవచ్చు.
- వాట్సాప్ తరహాలో.. అవతలి వ్యక్తి టైప్ చేస్తున్నప్పుడు దానిని మీరు గమనించవచ్చు.
- మీరు చేరవేయాల్సిన వారికి మెసేజ్ వెళ్లిందా, చదివారా అనేది తెలుసుకోవచ్చు.
ఇవీ చదవండి: స్క్రీన్షాట్ తీయడం ఇక మరింత ఈజీ!
