ఐఫోన్... ఇన్నాళ్లుగా ఈ ఫోన్ను క్రాక్ చేయడమంటే ఎంతటి కొమ్ములుతిరిగిన హ్యాకర్లకైనా అసాధ్యమనే భావన ఉండేది. కానీ నేడు ఆ భ్రమలు తొలిగిపోయాయి. హ్యాకర్లు క్షణాల్లోనే ఐఫోన్లను ఛేదించి విలువైన సమాచారాన్ని రాబట్టగలుగుతున్నారు. అదే సమయంలో ఆండ్రాయిడ్ ఫోన్లను క్రాక్ చేయడం మాత్రం వారికి కష్టమైపోతోంది. ఏంటీ ఆశ్చర్యపోతున్నారా? నమ్మడానికి కష్టంగా ఉన్నా ఇది నిజంగానే నిజం.
వ్యక్తిగత 'గోప్యత' పేరుతో
యాపిల్ ఐఫోన్లలో సెక్యూరిటీ చాలా కఠినంగా ఉంటుంది. దానిని ఛేదించడం సాధారణ హ్యాకర్ల వల్ల కాదు. అందుకే ఉగ్రవాదులు వాటిని ఎక్కువగా వాడుతుంటారు. ఫలితంగా ప్రభుత్వాలు ఎంతో కష్టపడి ఉగ్రవాదులను పట్టుకున్నా, వారి ఫోన్లలో ఉన్న సమాచారాన్ని సేకరించడం, న్యాయస్థానాల్లో నిరూపించడం చాలా కష్టమైపోతోంది.
ఉగ్రవాదుల ఐఫోన్లలోని సమాచారాన్ని తమకు (బ్యాక్డోర్ విధానంతో) తెలియజేయాలని అమెరికా ప్రభుత్వం... యాపిల్కు ఎంత మొరపెట్టుకున్నా ఫలితం లేకపోయింది. తాము వినియోగదారుల 'వ్యక్తిగత గోప్యత'కు అత్యంత ప్రాధాన్యం ఇస్తామని, కనుక వారి సమాచారాన్ని ఇవ్వడం కుదరదని యాపిల్ తేల్చిచెప్పింది. ఇప్పటికీ అదే చెబుతోంది.
యాపిల్కు షాక్
యాపిల్ తీరుతో విసిగిపోయిన అమెరికా ప్రభుత్వం... నేరస్థుల ఐఫోన్లను ఛేదించడానికి అనేక సంస్థలతో ఒప్పందం చేసుకుంది. వీటిలో 'సెల్లెబ్రైట్' సంస్థ ఒకటి.
సెల్లెబ్రైట్ తగిన సాధనాలు ఉపయోగించి... ఐఫోన్లలోని జీపీఎస్ రికార్డులు, కాల్లాగ్లు, కాంటాక్టులతో సహా ఇన్స్టాగ్రామ్, ట్విట్టర్, లింక్డ్ఇన్ వంటి నిర్దిష్ట యాప్ల్లోని విలువైన సమాచారాన్ని కూడా సేకరించగలుగుతోంది. నిజానికి సెల్లెబ్రైట్ ఉపయోగించే క్రాకింగ్ సాధనం... అన్ని ఐఫోన్లను, లేటెస్ట్ మోడళ్లతో సహా ఛేదించగలదు.
ఆండ్రాయిడ్ దగ్గర పప్పులుడకవ్
ఐఫోన్లను సులభంగా క్రాక్ చేయగలిగిన సెల్లెబ్రైట్ క్రాకింగ్ సాధనాలు... ప్రముఖ ఆండ్రాయిడ్ ఫోన్లను మాత్రం ఏమీ చేయలేకపోయాయి. ముఖ్యంగా గూగుల్ పిక్సెల్ 2, శాంసంగ్ గెలాక్సీ ఎస్ 9 ఫోన్లలోని సోషల్ మీడియా కంటెంట్, బ్రౌజింగ్ హిస్టరీ, జీపీఎస్ రికార్డులను సేకరించలేకపోయాయి. హువావే పి20 ప్రో విషయంలో అయితే ఈ క్రాకింగ్ సాధనాలు పూర్తిగా విఫలమయ్యాయి.
సీన్ రివర్స్
ఫోర్ట్వర్త్ పోలీస్ డిపార్ట్మెంట్ కోసం రెక్స్ కిజర్ అనే వ్యక్తి 'డిజిటల్ ఫోరెన్సిక్ పరీక్షలు' నిర్వహిస్తుంటారు. ఆండ్రాయిడ్ ఫోన్లలోని కొత్త ఆపరేటింగ్ సిస్టమ్లు చాలా కఠినంగా ఉంటున్నాయని, వాటిలోని డేటా సేకరించడం కష్టతరంగా ఉందని ఆయన చెబుతున్నారు.
"ఏడాది క్రితం ఎలాంటి ఆండ్రాయిడ్ ఫోన్ని అయినా హ్యాకర్లు ఇట్టే క్రాక్ చేయగలిగేవారు. ఐఫోన్లను మాత్రం ఏమీ చేయలేకపోయేవారు. కానీ ఇప్పుడు సీన్ రివర్స్ అయ్యింది. ఐఫోన్ లేటెస్ట్ మోడళ్లను కూడా హ్యాకర్లు సులభంగా ఛేదించగలుగుతున్నారు. అదే సమయంలో ఆండ్రాయిడ్ ఫోన్లను క్రాక్ చేయలేక సతమతమైపోతున్నారు. "- రెక్స్ కిజర్
గుర్తించాల్సిన విషయమేమంటే, ఐదేళ్ల క్రితం కంటే ఇప్పుడు ఆండ్రాయిడ్ ఫోన్లు భద్రతపరంగా చాలా పటిష్ఠంగా ఉన్నాయి. అయితే కంపెనీలు గోప్యత ముసుగులో తమ ఫోన్లను దుర్బేధ్యంగా మారుస్తున్నాయని రెక్స్ కిజర్ అభిప్రాయపడ్డారు.
భ్రమలు వద్దు బాబూ..!
ప్రస్తుతం ఆండ్రాయిడ్ ఫోన్లను క్రాక్ చేయడం కష్టమవుతున్నా... అది అసాధ్యం మాత్రం కాదు. కొంచెం శ్రమపడితే ఎలాంటి స్మార్ట్ఫోన్ను అయినా క్రాక్ చేయగలం. ప్రపంచంలోని ఎలాంటి ఫోన్ను అయినా ఛేదించగల హ్యాకర్లు ఉన్నారనడంలో ఎలాంటి సందేహం లేదు.
ఇదీ చూడండి: 'ఆర్థిక సంఘానికి శాశ్వత హోదా ఇచ్చే ఆలోచన లేదు'
