2020 నవంబర్ నెలలో ఎయిర్టెల్కు భారీ సంఖ్యలో కొత్త వినియోగదారులు వచ్చి చేరారు. దేశంలో అతిపెద్ద టెలికాం సంస్థగా ఆవిర్భవించిన జియోతో పోలిస్తే ఎక్కువగా కొత్త యూజర్లు జతయ్యారు.
ట్రాయ్ విడుదల చేసిన గణాంకాల ప్రకారం నవంబర్లో 43.7 లక్షల మంది చందాదారులు ఎయిర్టెల్ సభ్యత్వం తీసుకున్నారు. దీంతో సంస్థ యూజర్ల సంఖ్య 33.46 కోట్లకు పెరిగింది. అదేసమయంలో 19.36 లక్షల మంది వినియోగదారులు జియోలోకి చేరారు. వీరితో కలిపి జియో వినియోగదారుల సంఖ్య 40.82 కోట్లకు చేరింది. మరోవైపు, నవంబర్లో వొడాఫోన్ ఐడియా 28.9 లక్షల మంది వినియోగదారులను కోల్పోయింది. కంపెనీ యూజర్ బేస్ 28.99 కోట్లకు పరిమితమైంది.
2020 నవంబర్ చివరి నాటికి భారత్లో టెలిఫోన్ వినియోగదారుల సంఖ్య 117.53 కోట్లకు చేరిందని ట్రాయ్ తెలిపింది. ఇందులో పట్టణ వినియోగదారులు 64.86 కోట్లు, గ్రామీణ వినియోగదారులు 52.67 కోట్ల మంది ఉన్నారని వెల్లడించింది. మొత్తం వైర్లెస్ టెలికాం వినియోగదారు(115.52 కోట్లు)ల్లో 83.83 శాతం(96.84 కోట్లు) మంది యాక్టివ్గా ఉన్నారని పేర్కొంది. ఈ జాబితాలో ఎయిర్టెల్కు ఎక్కువ(96.63 శాతం) మంది యాక్టివ్ యూజర్లు ఉన్నారు.
బ్రాడ్బ్యాండ్ సర్వీస్ ప్రొవైడర్లలో రిలయన్స్కు 41 కోట్లు, ఎయిర్టెల్కు 17.45 కోట్లు, వొడాఫోన్ ఐడియాకు 12.1 కోట్లు, బీఎస్ఎన్ఎల్కు 2.61 కోట్ల మంది సబ్స్క్రైబర్లు ఉండగా... మొత్తం వినియోగదారుల్లో ఈ ఐదు సంస్థలకు చెందినవారే 98.84 శాతం మంది ఉన్నారు.
