ప్రపంచ వ్యాప్తంగా కరోనా విజృంభణ నేపథ్యంలో విమానయాన సంస్థలు తమ సేవలను రద్దు చేసుకున్న విషయం తెలిసిందే. ఈ తరుణంలో ప్రముఖ విమానయాన సంస్థలన్నీ లాక్డౌన్పై ట్విట్టర్ వేదికగా ఆసక్తికర సంభాషణ జరిపాయి. తమ భావాలను పరస్పరం పంచుకుంటూ.. ప్రస్తుత పరిస్థితుల్లో గగనతలంలో ఎగరడం కంటే నేలపై ఉండటమే మంచిదని ముక్తకంఠంగా స్పష్టం చేశాయి.
ఈ ఆసక్తికర ట్విట్టర్ సంభాషణను మొదట ప్రారంభించింది ఇండిగో. ఎయిర్ విస్తారాను ట్యాగ్ చేస్తూ.. "హే ఎయిర్ విస్తారా, ప్రస్తుతం మీరు విమాన సర్వీసులు నడపట్లేదని విన్నాం?" అని ట్వీట్ చేసింది. అలాగే స్టేయింగ్ పార్క్డ్స్టేయింగ్ సేఫ్, లెట్స్ఇండియాగో అనే హ్యాష్ట్యాగ్లు జోడించింది.
ఇండిగో ట్వీట్కు స్పందించిన ఎయిర్ విస్తారా.. "లేదు ఇండిగో, ఈ రోజుల్లో సర్వీసులను ఆపేసి విమానాలను నేలపై ఉంచడమే ఉత్తమమైన పని. ప్రస్తుతం సర్వీసులు కొనసాగించడమనేది తెలివైన ఎంపిక కాదు. గోఎయిర్... నువ్వు ఏమంటావ్?" అంటూ ప్రశ్నించింది.
విస్తారా ట్వీట్కు స్పందించిన గోఎయిర్.. "వందశాతం, విస్తారా! ఇంట్లో ఉండడం సురక్షితమైనది! అందరూ ఆకాశవీధుల్లో విహరించేంతవరకు మనం వేచి చూడగలం. ఎందుకంటే ప్రస్తుతం అందరూ ఎగరగలిగే పరిస్థితులు లేవు. నిజమేనా ఎయిర్ఏషియా?" అంటూ ఎయిర్ఏషియాను ప్రశ్నించింది.
గోఎయిర్ఇండియా, విస్తారా ట్వీట్లకు స్పందిస్తూ.. "కచ్చితంగా గోఎయిర్. ప్రస్తుతానికి ఇంట్లో ఉండడమనేది రెడ్, హాట్, స్పైసీ అంశం." అని బదులిచ్చింది ఎయిర్ఏషియా. అలాగే స్పైస్జెట్ను ట్యాగ్చేస్తూ.. ఇది నిజం కాదా? అని ప్రశ్నించింది.
ఆ తర్వాత ఎయిర్ఏషియా ట్వీట్కు స్పందించిన స్పైస్జెట్.. "మన రంగుల మాదిరే ఆలోచనలు కూడా కలిశాయి." అని ట్వీట్ చేసింది. అనంతరం ఈ సంభాషణలోకి దిల్లీ ఎయిర్పోర్టునూ ట్యాగ్ చేసింది స్పైస్జెట్.
ఈ ట్వీట్లకు తమదైన రీతిలో స్పందించారు దిల్లీ విమానాశ్రయం అధికారులు. మొత్తం నాలుగు విమానయాన సంస్థలను ట్యాగ్ చేస్తూ.. "అతి త్వరలో భారత ఆకాశవీధులు మీ రంగులతో నిండుతాయి." అని ట్వీట్ చేశారు.
హైదరాబాద్, బెంగళూరు విమానాశ్రయాలు కూడా ట్వీట్ల సంవాదంలో భాగమయ్యాయి. అన్ని విమానయాన సంస్థలతో పాటు ఎయిర్పోర్ట్ అధికారులు కూడా.. స్టేయింగ్పార్క్డ్స్టేయింగ్సేఫ్ అనే హ్యాష్ట్యాగ్ను జోడించారు.
