రెండు దశాబ్దాల ప్రజాస్వామ్య పాలనను కూలదోసి.. అఫ్గాన్ను తాలిబన్లు చేజిక్కించుకున్నారు. ప్రభుత్వాన్ని ఏర్పాటు చేసేందుకు సన్నాహాలు చేస్తున్నారు తాలిబన్లు. ఈ నేపథ్యంలో.. ప్రస్తుత అస్థిర పరిస్థితులతో భారత్- అఫ్గాన్ ద్వైపాక్షిక వాణిజ్యం తీవ్రంగా ప్రభావితం కానున్నట్లు నిపుణులు అభిప్రాయపడుతున్నారు.
అఫ్గాన్లో రాజకీయ పరిణామాలను గమనిస్తూ.. దేశీయ ఎగుమతిదారులు జాగ్రత్త పడాల్సిన అవసరం ఉందని ఫెడరేషన్ ఎక్స్పోర్ట్స్ ఆర్గనైజేషన్(ఎఫ్ఐఈఓ) డైరెక్టర్ జనరల్ అజయ్ సాహీ సూచించారు. ముఖ్యంగా చెల్లింపుల విషయంలో అత్యంత జాగ్రత్తగా ఉండాలని సూచించారు.
భారత్-అఫ్గాన్ వాణిజ్యం భారీగా పడిపోతుందని ఎఫ్ఐఈఓ మాజీ అధ్యక్షుడు ఎస్.కె.సరఫ్ పేర్కొన్నారు. అయితే ఇరు దేశాల మధ్య వాణిజ్యం పూర్తిగా నిలిచిపోయే అవకాశం లేదన్నారు . వారికి మన ఉత్పత్తుల అవసరం ఉండటం ఇందుకు కారణం స్పష్టం చేశారు.
ఇరు దేశాల వాణిజ్యం ఇలా..
2020-21 ఆర్థిక సంవత్సరంలో భారత్-అఫ్గాన్ దైపాక్షిక వాణిజ్యం 1.4 బిలియన్ డాలర్లుగా నమోదైంది. ఈ సమయంలో భారత్ అఫ్గాన్కు 826 మిలియన్ డాలర్ల విలువైన ఎగుమతులు చేసింది. అఫ్గాన్ నుంచి 510 మిలియన్ డాలర్ల విలువైన దిగుమతులు చేసుకుంది. 2019-20లో ఇరు దేశాల మధ్య ఎగుమతి దిగుమతుల విలువ 1.52 బిలియన్ డాలర్లుగా ఉన్నట్లు గణాంకాలు చెబుతున్నాయి.
అఫ్గానిస్థాన్ నుంచి భారత్ అత్యధికంగా.. ఎండు ద్రాక్షలు, వాల్నట్, బాదాం, అంజీర, పైన్ నట్, పిస్తా సహా పలు రకాల డ్రైఫ్రూట్స్, చెర్రీ, పుచ్చకాయలు, ఔషధ మూలికలను దిగుమతి చేసుకుంటుంది. భారత్ నుంచి అఫ్గానిస్థాన్కు తేయాకు, కాఫీ, మిరియాలు, కాటన్ వంటివి అధికంగా ఎగుమతవుతుంటాయి.
ఇదీ చదవండి: 'అప్పటికల్లా రూ.75లక్షల కోట్లకు ఎగుమతులు'
