2022-23 Budget: 2022-23 ఆర్థిక సంవత్సరంలో పెట్టుబడులను ప్రోత్సహించడానికి రాష్ట్రాలకు రూ. 1 లక్ష కోట్లను సాయంగా కేటాయిస్తున్నట్లు కేంద్ర ఆర్థిక మంత్రి నిర్మలా సీతారామన్ ప్రకటించారు. 50 ఏళ్ల వ్యవధితో ఇచ్చే ఈ వడ్డీ రహిత రుణాలు.. రాష్ట్రాల సాధారణ రుణాలకు అదనం. పీఎం గతి శక్తి, రాష్ట్రాల ఇతర మూలధన పెట్టుబడుల కింద ఈ నిధులను కేటాయిస్తారు. అయితే.. 2022-23లో రాష్ట్రాలకు ద్రవ్యలోటు పరిమితుల్లో ఊరటనిచ్చింది కేంద్రం. జీఎస్‌డీపీలో 4 శాతం వరకు ద్రవ్యలోటుకు అనుమతినిచ్చింది. కానీ ఈ మొత్తంలో 0.5 శాతం విద్యుత్ రంగ సంస్కరణలకు కేటాయించాలని స్పష్టం చేసింది.
రాష్ట్రాలకు సాయంగా కేటాయించిన నిధులను గ్రామ్ సడక్ యోజన, డిజిటల్ పేమెంట్స్, ఓఎఫ్సీ నెట్వర్క్లను పూర్తి చేయడం సహా ఆర్థిక వ్యవస్థ డిజిటలీకరణ, రవాణా, టౌన్ ప్లానింగ్ స్కీంలకు కేటాయిస్తున్నట్లు ఆర్థిక మంత్రి పేర్కొన్నారు.
బడ్జెట్ స్వరూపం
- 2022-23 మొత్తం బడ్జెట్ అంచనాలు రూ.39.45 లక్షల కోట్లు.
- 2022-23 మూలధన వ్యయం అంచనా రూ.10.68 లక్షల కోట్లు. ఇది జీడీపీలో 4.1 శాతం.
- 2022-23 బడ్జెట్లో ద్రవ్య లోటు అంచనా 6.4 శాతం; 2021-22 ద్రవ్యలోటు 6.9.
- 2025-26 నాటికి ద్రవ్యలోటును 4.5 శాతానికి తగ్గించడం లక్ష్యం.
- 2022-23 ఆదాయ వనరులు రూ.22.84 లక్షల కోట్లు.
- జీఎస్‌డీపీలో రాష్ట్రాలకు 4 శాతం వరకు ద్రవ్యలోటుకు అనుమతి.
- 'రాష్ట్రాల మూలధన పెట్టుబడులు' పథకానికి బడ్జెట్ అంచనాల్లో రూ. 10,000 కోట్ల నుంచి రూ. 15,000 కోట్లకు పెంపు.
- 2021-22 బడ్జెట్లో మూలధన వ్యయం 34.83లక్షల కోట్లుగా అంచనా వేస్తే.. దానిని రూ.37.70లక్షల కోట్లకు సవరించారు.
ఇదీ చదవండి: 'ఇక దేశంలో ఎక్కడి నుంచైనా భూ రిజిస్ట్రేషన్!'
