దేశంలో కరోనా వైరస్ వేగంగా వ్యాపిస్తోంది. ఈ మహమ్మారి బారిన పడుతున్న వారి సంఖ్య రోజురోజుకు పెరుగుతోంది. కర్ణాటక, కేరళ, మహారాష్ట్ర, ఉత్తరాఖండ్లో ఆదివారం కొత్త కేసులు నమోదయ్యాయి. ఫలితంగా దేశంలో కరోనా సోకిన వారి సంఖ్య 112కు చేరినట్టు సమాచారం.
కర్ణాటకలో..
కర్ణాటకలో తాజాగా ఓ మహిళకు కరోనా పాజిటివ్గా తేలింది. కలబురిగి జిల్లా ఆస్పత్రిలో ఆమెకు వైద్యం అందిస్తున్నారు. బాధితురాలి ఆరోగ్యం నిలకడగా ఉన్నట్లు వైద్యులు తెలిపారు. రాష్ట్రంలో మొత్తం కేసుల సంఖ్య 7కు చేరింది. ఇప్పటి వరకు ఒకరు మృతి చెందగా.. ఐదుగురు బెంగళూరులోని ఓ ఆస్పత్రిలో చికిత్స పొందుతున్నారు.
కేరళలో..
కేరళలో మరో రెండు కరోనా పాజిటివ్ కేసులు నమోదైనట్లు రాష్ట్ర ఆరోగ్య శాఖ మంత్రి కేకే శైలజ ప్రకటించారు. ఒకరు బ్రిటన్ దేశీయుడు కాగా మరొకరు ఓ వైద్యుడిగా గుర్తించారు. వారు విదేశాల నుంచి వచ్చినట్లు తెలిపారు మంత్రి. తాజా కేసులతో రాష్ట్రంలో మొత్తం కేసుల సంఖ్య 21కి చేరింది.
మహారాష్ట్రలో..
మహారాష్ట్ర పుణెలో కొత్తగా ఒకరికి కరోనా సోకినట్లు నిర్ధరణ అయింది. ఆ వ్యక్తి జపాన్ నుంచి పుణెకు వచ్చినట్లు గుర్తించారు అధికారులు. రాష్ట్రంలో మొత్తం కేసుల సంఖ్య 32కు చేరుకుంది.
ఉత్తరాఖండ్లో తొలి కేసు..
ఉత్తరాఖండ్లో తొలి కరోనా కేసు నమోదైంది. అటవీ శాఖకు చెందిన శిక్షణ అధికారికి కరోనా పాజిటివ్గా తేలినట్లు ఆరోగ్య శాఖ తెలిపింది. ఆ వ్యక్తి ఇటీవలే స్పెయిన్ నుంచి వచ్చినట్లు గుర్తించారు అధికారులు. మొత్తం 25 నమూనాలను పరీక్షలకు పంపగా.. 17 నెగటివ్గా వచ్చినట్లు తెలిపారు.
ఇదీ చూడండి: కరోనాను జయించేందుకు ఇవి తెలుసుకోండి...
