కాస్త ఉపశమనం... కొంత నష్టం...

ఎండ వేడిమితో అల్లాడుతున్న రాష్ట్రాన్ని వరుణుడు పలకరించాడు. వడగాలులతో సతమతమైన ప్రజలు సోమవారం సాయంత్రం కురిసిన వర్షంతో ఉపశమనం పొందారు. హైదరాబాద్​తో పాటు పలు జిల్లాల్లో బీభత్సం సృష్టించిన వాన అక్కడక్కడా కొంత నష్టాన్ని మిగిల్చింది. బంగాళాఖాతంలో ఉపరితల ఆవర్తనం వల్ల వర్షాలు కురుస్తున్నాయని హైదరాబాద్​ వాతావరణ శాఖ అధికారులు తెలిపారు.

రెండు నెలలుగా ఎండ ప్రచండంతో అల్లాడిన రాష్ట్ర ప్రజలు సోమవారం సాయంత్రం మారిన వాతావరణంతో కాస్త ఉపశమనం పొందారు. పగలు 40 డిగ్రీల వేడితో సతమతమైన జనం సాయంత్రం వర్షంతో సేద తీరారు. సీజన్​ ఆరంభంలో కురిసిన వర్షం ఖరీఫ్​లో తమకు కలిసొస్తుందని అన్నదాతలు అంచనా వేస్తున్నారు. హైదరాబాద్​తో పాటు పలు జిల్లాల్లో వరుణుడు బీభత్సం సృష్టించాడు. అత్యధికంగా నగర శివారులోని మీర్కాన్​పేటలో 92.8 మిల్లీ మీటర్ల వర్షం కురిసింది.

ఈదురు గాలుల బీభత్సం

హైదరాబాద్​లో పది నిమిషాల వ్యవధిలోనే కురిసిన వాన బీభత్సం సృష్టించింది. చాలా ప్రాంతాలు జలమయమయ్యాయి. జూబ్లీహిల్స్, ముషీరాబాద్, శంషాబాద్, నాచారం, లాలాపేట్ తదితర ప్రాంతాల్లో చెట్లు నేలకొరిగాయి. ఎస్​ఆర్​ నగర్ పరిధిలో విద్యుదాఘాతానికి గురై ఓ వ్యక్తి మృతి చెందాడు. పలు ప్రాంతాల్లో గంటల పాటు విద్యుత్ నిలిచిపోయింది. రహదారులపై భారీగా నీరు చేరడం వల్ల ట్రాఫిక్ అంతరాయం కలిగింది. వనస్థలిపురం, జూబ్లీహిల్స్​లలో విద్యుత్ స్తంభాలు కూలి రెండు వాహనాలు ధ్వంసమయ్యాయి.

పలు జిల్లాల్లో...

యాదాద్రి భువనగిరి జిల్లా మల్లాపురంలో తాటి చెట్టు మీదపడి ఓ గీత కార్మికుడు మృతి చెందాడు. నల్గొండ జిల్లా దేవరకొండలో గోడ కూలి ఓ వ్యక్తి మృతి చెందగా... మరో వ్యక్తికి గాయాలయ్యాయి. నిర్మల్ జిల్లాలోని గ్రామాల్లో 9 విద్యుత్ నియంత్రికలు నేలకొరిగాయి. మంచిర్యాల జిల్లా టీజీపల్లి గ్రామంలో సెల్ టవర్ కూలి ఇంటిపై పడిపోయింది.

నైరుతి కాదు

బంగాళాఖాతంలో ఉపరితల ఆవర్తనం ఏర్పడినందున తెలంగాణలో వర్షాలు కురుస్తున్నాయని హైదరాబాద్​ వాతావరణ శాఖ తెలిపింది. ఈ వానలకు... నైరుతి రుతుపవనాలకు సంబంధం లేదని అధికారులు వెల్లడించారు. నైరుతి పవనాలు వేగంగా కదులుతున్నాయని... ఈ నెల 6న కేరళను తాకే అవకాశాలున్నాయన్నారు. ఇవాళ, రేపు అక్కడక్కడా వర్షాలు కురుస్తాయని పేర్కొన్నారు.

ఇదీ చూడండి : వర్షం కురిసింది... నష్టం మిగిల్చింది