రాజస్థాన్ సరిహద్దులోని బికనేర్ పట్టణంలో భూ కేటాయింపుల కేసు విచారణ కోసం రాబర్ట్ వాద్రా, ఆయన తల్లి మౌరిన్లు జైపూర్లోని ఎన్ఫోర్స్మెంట్ డైరెక్టరేట్(ఈడీ)కు హాజరయ్యారు. ఏఐసీసీ ప్రధాన కార్యదర్శి, ఆయన భార్య ప్రియాంక గాంధీ అతనితో పాటు ఈడీ కార్యాలయానికి వచ్చారు.
ఈడీ ముందు హాజరవడం వాద్రాకు నాలుగోసారి కాగా, జైపూర్లో ఇదే మొదటిది. మనీ లాండరింగ్ కేసు విచారణ కోసం మూడుసార్లు దిల్లీలో కార్యాలయంలో హాజరయ్యారు వాద్రా.
బికనేర్ కేసులో ఇంతకుముందే వాద్రాకు మూడు సార్లు సమన్లు జారీ చేశారు. అయినప్పటికీ ఆయన విచారణకు హాజరుకాలేదు. ఎలాంటి చర్యలు తీసుకోకుండా ఈడీని ఆదేశించాలని వాద్రా, ఆయన తల్లి రాజస్థాన్ కోర్టును ఆశ్రయించారు. ఈడీకి సహకరించాలని న్యాయస్థానం ఆదేశించడం వల్ల విచారణకు హాజరయ్యారు.
ఇదీ కేసు...
రాజస్థాన్లోని పాకిస్థాన్ సరిహద్దు సమీపంలో ఉన్న ప్రాంతం బికనేర్. ఇక్కడ భూమి కేటాయింపులో ఫోర్జరీ జరిగిందని తహశీల్దారు గతంలో పోలీసులకు ఫిర్యాదు చేశారు. పోలీసులు దాఖలు చేసిన చార్జిషీట్లు, ప్రాథమిక సమాచార నివేదికల ఆధారంగా ఈడీ 2015లో క్రిమినల్ కేసు నమోదు చేసింది.
'ఎమ్ఎస్ స్కైలైట్ హాస్పిటాలిటీ ప్రైవేటు లిమిటెడ్' ఇక్కడ భూములను కొనుగోలు చేసింది. ఈ సంస్థతో వాద్రాకు సంబంధాలున్నాయన్న ఆరోపణలు ఉన్నాయి. సంస్థ వ్యవహారాల గురించి తెలుసుకోవటానికి ఈడీ వాద్రాను ప్రశ్నించినట్టు తెలుస్తోంది.
