పశువ్యాధుల నియంత్రణపై ప్రత్యేక దృష్టి సారించిన కేంద్ర ప్రభుత్వ ఆశయానికి అనుగుణంగా బయోవెట్ సంస్థ అడుగులు వేస్తోంది. కర్ణాటకలోని కోలార్ జిల్లా మాలూర్లో పశువ్యాధుల నియంత్రణకు భారీ మొత్తంలో పెట్టుబడి పెట్టేందుకు నిశ్చయించింది. పశువ్యాధులను నియంత్రించే వ్యాక్సిన్ల ఉత్పత్తిని విస్తృతం చేసే దిశగా రూ.200కోట్లతో మరో వ్యాక్సిన్ ఉత్పత్తి పరిశ్రమను నెలకొల్పనున్నట్లు సంస్థ వ్యవస్థాపకులు డాక్టర్ కృష్ణ ఎల్లా తెలిపారు.
ఈ నూతన పరిశ్రమ సాయంతో జంతువులకు సోకే ఫుట్ అండ్ మౌత్ (ఎఫ్ఎండీ), బ్రూసెల్లోసిస్ వ్యాధులను నివారించే ఎఫ్ఎండీ వ్యాక్సిన్ల ఉత్పత్తిని 20కోట్ల డోసుల నుంచి 50 కోట్ల డోసులకు పెంచనున్నట్లు ప్రకటించారు కృష్ణ. తద్వారా ప్రపంచంలోని అతిపెద్ద ఎఫ్ఎండీ ఉత్పత్తిదారుగా బయోవెట్ సంస్థ అవతరిస్తుందని ఆయన ఆశాభావం వ్యక్తం చేశారు.
దేశంలో ఏర్పడ్డ ఎఫ్ఎండీ వ్యాక్సిన్ల కొరతను తగ్గించడం సహా స్థానికులకు పెద్దమొత్తంలో ఉపాధి కల్పించేందుకు మాలూర్‌లోని వ్యాక్సిన్ తయారీ కేంద్రం దోహదం చేస్తుందన్నారు కృష్ణ ఎల్లా.
ఇదీ చూడండి : పార్లమెంట్లో 10 ఆర్డినెన్స్లను ప్రవేశపెట్టిన కేంద్రం
