ఎన్నికల విధులతో రైతుల కార్యక్రమాలు చేపట్టడానికి ఇబ్బందులు ఎదురవుతున్నాయని వ్యవసాయ శాఖ ప్రభుత్వానికి నివేదించింది. దీనిపై స్పందించిన ముఖ్యమంత్రి ఆ శాఖ సిబ్బందిని ఎన్నికల విధులకు వినియోగించవద్దని అన్ని జిల్లాల కలెక్టర్లకు ఆదేశాలు పంపాలని నిర్ణయించారు. రైతు సర్వే పది రోజుల్లో పూర్తి చేయాలని కేసీఆర్ ఆదేశించగా.. అది సాధ్యం కాదని, కనీసం నెల రోజులు పడుతుందన్న ఆ శాఖ విన్నపాన్ని ఆమోదించారు. మే 20లోగా సమగ్ర సర్వే పూర్తి చేసేందుకు వ్యవసాయ శాఖ ఏర్పాట్లు చేస్తోంది.
ఇప్పటి వరకూ 54.60 లక్షల మందికి మాత్రమే కొత్త పట్టాదారు పాస్పుస్తకాలు పంపిణీ చేశామని రెవెన్యూశాఖ తెలిపింది. ఈ సమాచారామంతా అంతర్జాలంలో ఉంది. దీనిని గ్రామాల్లో ఉండే వ్యవసాయ విస్తరణ అధికారికి పంపనుంది. ఈ సమాచారంతో అందరి ఇళ్లకు వెళ్లి సమగ్రంగా పూర్తి సమాచారం సేకరించాలి. ఈ వివరాలన్నీ మే నెలాఖరులోగా ఆన్లైన్లో పొందుపర్చాలి. వీటిని ప్రామాణికంగా తీసుకొని ఏ సమయంలో ఏ ప్రాంతంలో ఏ పంటలు సాగుచెయ్యాలనేది నిర్ణయించి పంట కాలనీల కార్యక్రమానికి శ్రీకారం చుట్టాలనేది వ్యవశాయ శాఖ ప్రణాళిక.
పూర్తి సమాచార సేకరణే లక్ష్యం
సాధారణ పంటలే కాకుండా ఉద్యాన , సుగంధ ద్రవ్యాలు వంటి పంటల సాగు వివరాలన్నీ సేకరించాలని ఉద్యానశాఖ ఏఈవోలకు సూచనలిచ్చింది. ఇప్పటి వరకు ఏ ఏ ప్రాంతాల్లో ఏ పంటలు సాగవుతున్నాయనే సమాచారం లేదు. ఈ సర్వేతో పంటల దిగుబడిపై పక్కా అంచనాలు వస్తాయని భావిస్తున్నారు.
అందరి వివరాలు సేకరించం
తాము చేసే సమగ్ర సర్వేలో కొత్త పట్టాదారు పాస్పుస్తకం అందిన లేదా డిజిటల్ సంతకమైన రైతు జాబితాలనే తీసుకుంటామని వ్యవశాయ శాఖ ముఖ్య కార్యదర్శి పార్థసారథి తెలిపారు.
