కేరళలో జికా వైరస్ వ్యాప్తి స్థానికంగా ఆందోళన కలిగిస్తోంది. కొత్తగా మరో 14 కేసులు బయటపడ్డాయి. దీంతో మొత్తం కేసుల సంఖ్య 15కు చేరింది. వీరిలో ఎక్కువ మంది ఆరోగ్య కార్యకర్తలు కావడం గమనార్హం.
జికా తొలి కేసు తిరువనంతపురంలోని పరస్సాలలో నమోదైంది. ఓ 24 ఏళ్ల గర్భిణికి వైద్యులు గురువారం పరీక్షలు నిర్వహించగా ఆమెకు ఈ వైరస్ సోకినట్లు వెల్లడైంది. ఈ నెల 7న ఆమె ఓ బిడ్డకు జన్మనిచ్చింది. బిడ్డలో వైరస్ లక్షణాలు లేనందున వైద్యులు ఊపిరి పీల్చుకున్నారు.
ఆ ఆసుపత్రిలోని 19 మంది సిబ్బందికి పరీక్షలు నిర్వహించగా.. 14 మందికి వైరస్ సోకినట్లు నిర్ధరణ అయింది.
జ్వరం, దద్దుర్లు, తలనొప్పి, ఒళ్లునొప్పులు జికా వైరస్ లక్షణాలని వైద్యులు వెల్లడించారు. ఈ వైరస్కు మందు లేకపోవడం ఆందోళన కలిగించే విషయం.
ఇదీ చదవండి : గంగా నదిలో కరోనా- కొత్త ట్విస్ట్!
