కుక్కకు బెలూన్లు కట్టి గాల్లోకి.. యూట్యూబర్ అరెస్టు

జంతు హింస కింద దిల్లీకి చెందిన ఓ యూట్యూబర్​ అరెస్టయ్యాడు. తన పెంపుడు శునకానికి బెలూన్లు కట్టి గాలిలో తేలేలా చేసినందుకు అతడిపై కేసు నమోదైంది.

పెంపుడు శునకానికి బెలూన్లు కట్టి, గాలిలో తేలేలా చేసిన దిల్లీకి చెందిన యూట్యూబర్ గౌరవ్​ శర్మ అరెస్టయ్యాడు. జంతు హింస కింద 'పీపుల్​ ఫర్​ యానిమల్స్ సొసైటీ' ఫిర్యాదు మేరకు పోలీసులు అతడిని అదుపులోకి తీసుకున్నారు.

యూట్యూబ్​ వీడియో కోసం..

మాలవీయ నగర్​కు చెందిన గౌరవ్​.. తన తల్లితో కలిసి ఓ యూట్యూబ్​ వీడియో కోసం పెంపుడు శునకానికి హీలియం బెలూన్లు కట్టాడు. అనంతరం గాలిలో తేలేలా చేశాడు. మే21న వీడీయోను యూట్యూబ్​లో పెట్టాడు. అనంతరం ఈ వీడీయో వైరల్​ కాగా, స్పందించిన 'పీపుల్​ ఫర్​ యానిమల్స్ సొసైటీ'.. శునకం ప్రాణాలను ఫణంగా పెట్టాడంటూ అతడిపై కేసు నమోదు చేసింది. దీంతో అతడిని అరెస్టు చేసిన పోలీసులు.. దర్యాప్తు చేపట్టారు.

అనంతరం యూట్యూబ్​లో పెట్టిన వీడియోను గౌరవ్​ తొలగించాడు. క్షమాపణలు చెబుతూ మరో వీడియో పోస్టు చేశాడు. కాగా, అప్పటికే ఆ వీడియో వైరల్​ అయ్యి అతడి అరెస్టుకు దారితీసింది.

ఇదీ చూడండి: పెంపుడు శునకాన్ని కారుకు కట్టి.. ఈడ్చుకెళ్లి..