నిరంతరం కరవులో కొట్టుమిట్టాడే ప్రాంతం అది. అనుభవమున్న రైతులు సైతం అలాంటి ప్రాంతాల్లో వ్యవసాయం చేసేందుకు మొహం చాటేస్తుంటారు. కానీ ఓ యువతి మాత్రం ఆ ప్రాంతంలో వ్యవసాయం చేస్తానని పట్టుపట్టింది. అందులోనూ సేంద్రీయ సాగు పద్ధతిని అనుసరించి మంచి ఫలితాలను చూపిస్తానని ఛాలెంజ్ చేసింది. ఇందుకోసం తల్లితండ్రులను ఒప్పించి మరీ ఐటీ ఉద్యోగాన్ని వీడింది. ఫలితంగా... వ్యవసాయం ద్వారా లక్షలు సంపాదిస్తూ యువ రైతులకు ఆదర్శంగా నిలుస్తోంది. ఆమే కర్ణాటక చిత్రదుర్గ జిల్లా ద్రోణహళ్లి గ్రామానికి చెందిన రోజారెడ్డి.
ఆ రోజుల్లోనే..
చదువుకుంటున్న రోజుల్లోనే రోజారెడ్డికి వ్యవసాయంపై మక్కువ పెరిగింది. అయితే.. తల్లిదండ్రుల ఒత్తిడితో ఐటీ ఉద్యోగంలో చేరింది. ఖాళీ సమయంలో సేంద్రీయ వ్యవసాయంపై పరిశోధనలు చేసింది. ఈ నేపథ్యంలో కరోనా విపత్కర పరిస్థితుల్లో విధించిన లాక్డౌన్ను... వ్యవసాయం చేయాలనే తన ఆశకు బాసటగా మార్చుకుంది.
ఉద్యోగం మానేసిన తర్వాత.. తనకున్న 6 ఎకరాల భూమిలో 35 రకాల కూరగాయలను పండిస్తోంది రోజారెడ్డి. ఇలా రోజుకు దాదాపు రూ. 10వేల వరకూ అర్జించడం మొదలుపెట్టింది. ఈ కూరగాయల సాగు కోసం బెళగావితో పాటు మహారాష్ట్ర నుంచి విత్తనాలు తెప్పించినట్లు చెబుతోంది.
యాప్ కూడా....
నీటి కోసం తిప్పలు పడకుండా ముందుగానే పొలంలో బోరు బావి వేయించింది రోజారెడ్డి. తర్వాత నీరు వృథా కాకుండా పొలంలో డ్రిప్ ఇరిగేషన్ పద్ధతిని ఏర్పాటు చేసింది. సేంద్రీయ ఎరువులు ఉపయోగిస్తూ... కూరగాయలు పండిచడమే కాక వివిధ రకాలు పూల మొక్కలనూ పెంచుతోంది.
ఇలా పండించిన కూరగాయలు అమ్మేందుకు రోజారెడ్డి... ఒక మొబైల్ యాప్ను కూడా అభివృద్ధి చేసింది. బెంగళూరు, ఉడుపి ప్రాంతాలకు ఈ కూరగాయలను సరఫరా చేస్తోంది. వటితో పాటు సేంద్రీయ వ్యవసాయంపై రైతులకు అవగాహన పెంచేందుకూ పలు కార్యక్రమాలు నిర్వహిస్తోంది.
రసాయనిక ఎరువులతో పండించిన కూరగాయల వల్ల కలిగే నష్టాన్ని దృష్టిలో పెట్టుకుని ఈ పద్ధతిని అవలంభిస్తున్నానని రోజా చెబుతోంది. ఆన్లైన్ ఆర్గానిక్ మార్కెటింగ్ కంపెనీ ఏర్పాటు చేయడమే లక్ష్యమని అంటోంది.
ఇదీ చదవండి:'రైతులకు ఒక్క ఫోన్కాల్ దూరంలో ప్రభుత్వం'
