చిన్న హార్మోనియం.. పెద్ద రికార్డు

తన తమ్ముడు కుమారునికి సంగీతం నేర్పించేందుకు ప్రపంచంలోనే అతి చిన్న హార్మోనియంను తయారు చేశాడు ఓ వ్యక్తి. అతి చిన్న సంగీత పరికరాన్ని రూపొందించినందుకు గానూ రాజస్థాన్​కు చెందిన అశోక్​ ఆర్య జీనియస్​ బుక్​ ఆఫ్ రికార్డుల్లో స్థానం సంపాదించారు.

ప్రపంచంలోనే అతి చిన్న హార్మోనియంను తయారు చేసి రికార్డు సృష్టించాడు రాజస్థాన్​ చురు ప్రాంతానికి చెందిన అశోక్​ ఆర్య. తన తమ్ముడి కుమారునికి సంగీతం నేర్పించేందుకు చేసిన ఈ వాద్యం.. చూడడానికి చిన్నదిగా ఉన్నా, సప్త స్వరాలను ఘనంగా పలికిస్తోంది. కేవలం ఈ చిన్న హార్మోనియాన్ని మాత్రమే కాకుండా చెక్క వ్యర్థాలతో మరెన్నో కళాకండాలను తయారు చేసి కళ పట్ల తన మక్కువను చాటుకుంటున్నారు.

హార్మోనియం ప్రత్యేకత ఏంటి?

సాధారణంగా హార్మోనియంకు రెండు, మూడు రీడ్​ సెట్లు ఉంటాయి. కానీ ఈ చిన్న దానిలో మాత్రం ఆరు రీడ్​ సెట్లు ఏర్పాటు చేసినట్లు అశోక్​ ఆర్య తెలిపారు. ఈ వాద్యం 9 అంగుళాల పొడవు, 6 అంగుళాల వెడల్పుతో 5 అంగుళాల ఎత్తుతో రూపొందించారు. ఆ హార్మోనియం రూపొందించేందుకు ఆర్యకు రెండు నెలలు పట్టిందని తెలిపారు. అతి చిన్న హార్మోనియంను రూపొందించినందుకు గానూ జీనియస్​ బుక్​ ఆఫ్ రికార్డుల్లో స్థానం సంపాదించాడు.

"మా తమ్ముడి కుమారునికి రెండేళ్లు ఉంటాయి. వాడి చిట్టి చిట్టి వేళ్లకు సరిపడే వాద్యాన్ని తయారు చేయాలని అనుకున్నా. అందుకు సంబంధించిన చిన్న రీడ్​ సెట్​ను స్వయంగా రూపొందించాను. ఇందులో మొత్తం స్వదేశీ పరిజ్ఞాన్ని మాత్రమే ఉపయోగించాను. కలపతో పాటు ఇత్తడితో ఈ సంగీత పరికరం తయారైంది."

- అశోక్​ ఆర్య, హార్మోనియం తయారీదారు.

చెక్క వ్యర్థాలతో మరిన్ని కళాకండాలు..

అశోక్ ఆర్య పర్యావరణ ప్రేమికుడు కూడా. దీంతో ఆయన చిన్న చిన్న చెక్కలతో కళాకండాలను తయారు చేశారు. ప్రపంచ వింతల్లో ఒకటైన తాజ్​మహల్​, ఇతర దేవాలయాల ఆకృతులను రూపొందించారు. అంతేగాక జోడెడ్ల బండిని, ఓడ బొమ్మను, పండ్లు, పూల స్టాండ్​ను చేసి వాటిని ఇంట్లో ప్రత్యేక ఆకర్షణ కోసం ఉంచారు.