man sets fire to woman: కేరళలో దారుణం జరిగింది. యువతిపై పెట్రోల్ పోసి నిప్పంటించాడు ఓ వ్యక్తి. కోజికోడ్ జిల్లాలోని ఓ గ్రామ పంచాయతీ కార్యాలయంలో పని చేసే ఆమెను చంపి.. తానూ నిప్పంటించుకున్నాడు. ఇరువురికి తీవ్రంగా గాయాలు కాగా.. వారిని ఆసుపత్రికి తరలించారు. చికిత్సపొందుతు ఆ యువతి మరణించినట్లు అధికారులు తెలిపారు. అనంతరం యువకుడు సైతం ప్రాణాలు కోల్పోయాడు.
ఈ ఘటన శుక్రవారం ఉదయం 10 గంటల ప్రాంతంలో జరిగింది. తిక్కోడి గ్రామ పంచాయతీ కార్యాలయంలో ఈ ఘటన జరిగినట్లు గుర్తించారు. బాధితురాలు కంప్యూటర్ సైన్స్‌లో పోస్ట్ గ్రాడ్యుయేట్ పూర్తి చేసుకొని నాలుగు రోజుల క్రితమే పంచాయతీ కార్యాలయంలో ప్రాజెక్ట్ అసిస్టెంట్‌గా చేరిందని వివరించారు.
ఒకే ప్రాంతంలో ఉంటూ..
నిందితుడు తిక్కోడికి చెందిన నందకుమార్(26)గా పోలీసులు గుర్తించారు. దారుణానికి పాల్పడటానికి గల కారణాలేంటి? అన్న విషయాలు తెలియాల్సి ఉందని పోలీసులు పేర్కొన్నారు. యువతీయువకుడికి ఇదివరకే పరిచయం ఉందని, ఒకే ప్రాంతంలో నివాసం ఉంటున్నారని తెలిపారు. ఈ వ్యవహారంపై కేసు నమోదు చేసి దర్యాప్తు చేయనున్నట్లు స్పష్టం చేశారు.
ఇదీ చూడండి: కొవిడ్ పరిహారం చెల్లింపులో జాప్యం- రాష్ట్రాలపై సుప్రీం అసహనం
