Woman DSP Molested: పోలీసు వ్యవస్థకే మచ్చ తెచ్చే ఘటన ఒకటి ఝార్ఖండ్ రాంచీలో జరిగింది. ఏకంగా మహిళా డీఎస్పీనే కొందరు ఆకతాయిలు ఆట పట్టించారు. రాత్రి సమంయలో ఆమెను వేధించారు. ఇద్దరు కానిస్టేబుళ్లు కూడా యువకులను రెచ్చగొడుతూ.. డీఎస్పీని రక్షించకుండా వ్యవహరించారని తెలుస్తోంది.
ఇదీ జరిగింది..
రాంచీ ఓల్డ్ పోలీస్ లైన్ సమీపంలో.. సోమవారం రాత్రి విగ్రహ నిమజ్జన కార్యక్రమంలో భాగంగా ఊరేగింపు జరుగుతోంది. అసభ్యకర డీజే పాటలకు మద్యం మత్తులో ఉన్న యువకులు చిందులు వేస్తున్నారు. సమాచారం అందుకున్న మహిళా డీఎస్పీ అక్కడికి చేరుకొని.. పాటలు ఆపేసి, వెంటనే వెళ్లిపోవాలని హెచ్చరించారు. దీంతో ఆగ్రహించిన యువత.. ఆమెపై వేధింపులకు దిగారు. అసభ్యంగా ప్రవర్తించారు.
ఈ క్రమంలోనే ఒక యువకుడిని చెంపదెబ్బ కొట్టారు డీఎస్పీ. వెంటనే అక్కడున్న 15 మంది ఆమె చుట్టూ గుమికూడి అల్లరి చేశారు. పక్కనే ఉన్న ఇద్దరు పోలీస్ కానిస్టేబుళ్లు వినోద్ పాండే, సీపీ ఉపాధ్యాయ్ రక్షించడం మాని.. వారికి సహకరించారని ఆమె ఆరోపించారు. ఆ ఇరువురూ యువకులను ఇంకా రెచ్చగొట్టారని మహిళా డీఎస్పీ.. లోయర్ బజార్ పోలీస్ స్టేషన్లో ఫిర్యాదు చేశారు. సంబంధిత వీడియోను కూడా సమర్పించారు.
మొత్తం 15 మంది గుర్తుతెలియని యువకులు సహా ఇద్దరు కానిస్టేబుళ్లపై కేసు నమోదు చేసుకున్న పోలీసులు.. నిందితుల కోసం గాలిస్తున్నారు.
ఇవీ చూడండి: కులమతాలే ప్రచారాస్త్రాలు- మౌలిక సమస్యల ప్రస్తావనే లేదు!
