యూకేలో జాతివివక్ష ఘటనలను నిశితంగా పరిశీలిస్తున్నామని, అవసరమైతే కఠిన చర్యలు చేపడతామని విదేశాంగ మంత్రి జైశంకర్ స్పష్టం చేశారు. జాతివివక్షపై పోరులో తప్పక గెలుస్తామని సోమవారం పార్లమెంటు వేదికగా వ్యాఖ్యానించారు.
ఇటీవల ఆక్స్ఫర్డ్ విశవిద్యాలయం విద్యార్థిపై జాతివివక్ష ఘటనను ప్రస్తావిస్తూ రాజ్యసభలో ఎంపీ అశ్వినీ వైష్ణవ్ అడిగిన ప్రశ్నకు జైశంకర్ ఈ విధంగా స్పందించారు.
"యూకే ప్రతిష్ఠకు భంగం కలుగుతున్న ఉద్దేశంతో ఈ ఘటనలపై ఆచితూచి వ్యవహరిస్తున్నాము. యూకేతో భారత్కు మంచి బంధం ఉంది. ఈ ఘటనలను పరిశీలిస్తున్నాము. అవసరమైతే వీటిని తీవ్రంగా పరిగణించి చర్యలు చేపడతాము. ఇది మహాత్మ గాంధీ పుట్టిన దేశం. కాబట్టి జాతివివక్షపై నిర్లక్ష్యం వహించే ప్రసక్తే లేదు."
-జైశంకర్, విదేశాంగ మంత్రి
కర్ణాటక ఉడుపికి చెందిన రష్మీ సమంత్ ఇటీవల ఆక్స్ఫర్డ్ యూనివర్సిటీ విద్యార్థుల సంఘం అధ్యక్షురాలిగా ఎన్నికయ్యారు. అయితే ఆమె సామాజిక మాధ్యమాల పోస్టులను తప్పుపడుతూ పలువురు జాతివివక్ష వ్యాఖ్యలు చేశారు. రాజీనామా చేయాలని డిమాండ్ చేయడం వల్ల ఆమె పదవి చేపట్టిన ఐదు రోజులకే బాధ్యతల నుంచి తప్పుకున్నారు.
ఇదీ చదవండి : 'నోటాకు ఎక్కువ ఓట్లు వస్తే ఎన్నిక రద్దు?'
