జమ్ము కశ్మీర్ అసెంబ్లీ ఎన్నికల విధుల్లో 18 ఏళ్ల కిందట.. ఉగ్రవాదులతో పోరాడుతూ ప్రాణాలొదిలాడు 45వ బెటాలియన్కు చెందిన సీఆర్పీఎఫ్ జవాన్ రమేశ్ కుమార్. దోడా టౌన్ హాల్ ప్రాంతంలో 2002 అక్టోబర్ 8న ఆయన మరణించాడు. అప్పట్లో రూ. 5 లక్షల ఎక్స్గ్రేషియా ప్రకటించింది ఎన్నికల సంఘం. కానీ.. ఆ మొత్తం ఆయన కుటుంబానికి చేరలేదు.
హరియాణా భివానీలో నివసించే రమేశ్ కుమార్ భార్య ప్రమీలా దేవి.. 2019లో ఎన్నికల సంఘానికి లేఖ రాసింది. సీఈఓ కార్యాలయంలో పెండింగ్లో ఉందని అప్పుడు వివరణ ఇచ్చారు. ఆ తర్వాత.. ఆమె మరోసారి ఈ ఆగస్టు 10న సీఈసీ సునీల్ అరోడాకు ఈ-మెయిల్ చేసి ఈ వ్యవహారంలో జోక్యం చేసుకోవాలని కోరింది.
అరోడా జోక్యంతో..
స్పందించిన అరోడా.. ప్రమీలా దేవికి ఎన్నికల యంత్రాంగం తరఫున క్షమాపణలు చెప్పారు. తన భర్త త్యాగం ఎప్పటికీ గుర్తుంచుకుంటారని భరోసానిచ్చారు. తక్షణమే ఆమెకు.. రూ. 20 లక్షల పరిహారం(2002లో రూ. 5 లక్షలు) చెల్లించాలని కమిషన్ నిర్ణయించినట్లు స్పష్టం చేశారు. ఆ మొత్తాన్ని ఆమె బ్యాంకు ఖాతాకు బదిలీ చేశారు.
ఇంకోసారి ఇలాంటి తప్పిదాలు జరిగితే.. తీవ్ర చర్యలు తప్పవని ఎన్నికల సంఘం అధికారులను హెచ్చరించారు అరోడా.
