బంగాల్ అధికార భాషల్లోకి తెలుగు కూడా చేరింది. మంగళవారం నిర్వహించిన కేబినెట్ సమావేశంలో ఈ నిర్ణయం తీసుకుంది మమత సర్కార్. తెలుగును అధికార భాషగా ఆమోదించింది. ఈ విషయాన్ని విద్యాశాఖ మంత్రి పార్థ ఛటర్జీ వెల్లడించారు. తెలుగును అధికార భాషగా చేయాలని బంగాల్లోని తెలుగువారు ఎప్పటినుంచో డిమాండ్ చేస్తున్నట్లు ఆయన మీడియా సమావేశంలో అన్నారు.
''తెలుగును అధికార భాషగా చేయాలని.. ఆ కమ్యూనిటీ ఎప్పటినుంచో డిమాండ్ చేస్తోంది. ఖరగ్పుర్ సదర్ నుంచి ఎమ్మెల్యే ప్రదీప్ సర్కార్ నేతృత్వంలో ప్రతినిధుల బృందం ఈ అంశంపై ప్రభుత్వాన్ని సంప్రదించింది. ఈ నేపథ్యంలో.. తెలుగును అధికార భాషగా ఆమోదిస్తూ ప్రభుత్వం నిర్ణయం తీసుకుంది. ఖరగ్పుర్లో అధికంగా ఉండే తెలుగు ప్రజల డిమాండ్ మేరకే దీనిని పరిగణనలోకి తీసుకున్నాం.''
- పార్థ ఛటర్జీ, బంగాల్ విద్యాశాఖ మంత్రి
బంగాల్లోని ఖరగ్పుర్లో తెలుగు ప్రజలు ఎక్కువగా ఉన్నారు. రాష్ట్రంలో ఇప్పటికే 10కిపైగా అధికార భాషలున్నాయి.
ఇదీ చూడండి: 'అభివృద్ధిలో బంగాల్ టాప్.. ఇవిగో ఆధారాలు'
