ప్రపంచవ్యాప్తంగా కరోనా మహమ్మారి(Covid Virus) కారణంగా మృతిచెందినవారికి ప్రధాని నరేంద్ర మోదీ(PM Modi) నివాళులు అర్పించారు. గత వందేళ్లలో ఇలాంటి మహమ్మారి మరొకటి రాలేదని స్పష్టం చేశారు. ఈ మేరకు కొవిన్ గ్లోబల్ కన్క్లేవ్లో మోదీ ప్రసంగించారు.
ఒంటరిగా ఏ దేశం కూడా కరోనా ఎదుర్కోలేదని అనుభవాల్లో స్పష్టమైందన్నారు. మానవత్వాన్ని పెంపొందించేందుకు మనమంతా కలిసి పనిచేయాలని పిలుపునిచ్చారు. కొవిడ్-19పై పోరాడేందుకు సాంకేతికత ఎంతో ముఖ్యమైనదన్నారు.
సాంకేతికతతో విజయం..
కొవిన్ యాప్ను(Cowin app) ప్రపంచంలోని అన్ని దేశాల్లో అందుబాటులోకి తెచ్చేందుకు భారత్ కట్టుబడి ఉందని మోదీ అన్నారు. సాంకేతికతతో కరోనాపై విజయం సాధించవచ్చని ధీమా వ్యక్తం చేశారు. కరోనా మహమ్మారి విజృంభించినప్పటి నుంచి భారత్.. తన అనుభవాలు, సవాళ్లు, వనరులను ప్రపంచంతో పంచుకుంటూ వచ్చిందని మోదీ అన్నారు. ఇక నుంచి మొత్తం టీకా ప్రక్రియను డిజిటల్ విధానంలోనే అనుసరిస్తామని తెలిపారు.
"కొవిడ్పై విజయం సాధించేందుకు వ్యాక్సినేషన్ ప్రక్రియ ఎంతో కీలకం. ప్రపంచాన్ని ఒకే కుటుంబంగా భావించటం భారత నాగరికతలో అంతర్భాగమే. ఆ ప్రాథమిక సత్యాన్ని కరోనా మహమ్మారి మరోసారి గుర్తుచేసింది. అందుకే కొవిడ్ వ్యాక్సినేషన్ యాప్ 'కొవిన్'ను ప్రపంచ దేశాలు వినియోగించేలా రూపొందించాం."
- ప్రధాని నరేంద్ర మోదీ
ప్రస్తుతం.. కెనడా, మెక్సికో, నైజీరియా సహా ప్రపంచవ్యాప్తంగా దాదాపు 50 దేశాలు కొవిన్ యాప్ను తమదేశాల్లో అందుబాటులోకి తెచ్చేందుకు ఆసక్తి కనబరుస్తున్నాయి.
ఇదీ చదవండి : 'ఆగస్టు నుంచే కరోనా మూడో దశ వ్యాప్తి'
