'మరో దఫా చర్చలతోనే చైనాతో వివాదం పరిష్కారం'

సరిహద్దు వివాదంపై చైనాతో మరో దఫా చర్చలు జరిగితే సమస్య పరిష్కారం అవుతుందని భావిస్తున్నట్లు విదేశీ వ్యవహారాల అధికార ప్రతినిధి అనురాగ్ శ్రీవాస్తవ తెలిపారు. తూర్పు లద్దాఖ్​లో ఇరు దేశాల బలగాల ఉపసంహరణకు పరస్పర అంగీకారంతో ఒప్పందం కుదురుతుందని ఆశిస్తున్నట్లు చెప్పారు.

చైనాతో మరోసారి చర్చలు జరిగితే తూర్పు లద్దాఖ్ సరిహద్దు వివాదం ఓ కొలిక్కి వస్తుందని ఆశిస్తున్నట్లు భారత విదేశీ వ్యవహారాల అధికార ప్రతినిధి అనురాగ్​ శ్రీవాస్తవ చెప్పారు. వాస్తవాధీన రేఖ వెంబడి అన్ని ఫ్రిక్షన్​ పాయింట్ల నుంచి రెండు దేశాల బలగాలను పూర్తిగా ఉపసంహరించుకునే విధంగా పరస్పర అంగీకారం కుదిరే అవకాశాలున్నాయని పేర్కొన్నారు.

రెండు దేశాల మధ్య దౌత్య, సైనిక పరమైన సంప్రదింపులు ఇంకా జరుగుతూనే ఉన్నాయని మీడియా సమావేశంలో తెలిపారు శ్రీవాస్తవ. ఈ చర్చల వల్లే ఎవరి స్థితి ఏంటనే విషయంపై ఇరు దేశాలకు స్పష్టమైన అవగాహన వస్తోందని పేర్కొన్నాారు. అయితే భారత్-చైనా మధ్య మరో దఫా చర్చలు ఎప్పుడు జరుగుతాయనే విషయంపై మాత్రం శ్రీవాస్తవ స్పష్టత ఇవ్వలేదు.

షాంఘైలోని భారత దౌత్య కార్యాలయంలో చైనీస్ కమ్యూనిస్టు పార్టీకి చెందిన కనీసం ఒక్కరినైనా నియమించినట్లు వస్తున్న వార్తలపై శ్రీవాస్తవ స్పందించారు. ఈ వివరాలను స్వతంత్రంగా ధ్రువీకరించే స్థితిలో తాము లేమన్నాారు. కొన్ని దేశాల్లో స్థానికులను నియమించాలంటే అక్కడి ప్రభుత్వ అనుమతి తప్పనిసరి అని స్పష్టం చేశారు.

చైనీస్ కమ్యూనిస్టు పార్టీకి చెందిన వ్యక్తి నియామకం వాార్తలు పూర్తిగా నిరాధారమైనవని చైనా రాయభార అధికార ప్రతినిధి కొట్టిపారేశారు.