Vande Bharat Special Features : ఆధునిక సాంకేతికతను ఉపయోగించుకొని రైలు ప్రయాణికులకు మరింత భద్రతను కల్పించే ఉద్దేశంతో భారత రైల్వే శాఖ ముందుకు కదులుతోంది. ఇందుకోసం కొత్తగా తయారు చేసే వందే భారత్ రైళ్లలో.. విమానంలో ఉండే బ్లాక్బాక్స్ను అమర్చుతున్నారు. బంగాల్లోని చిత్తరంజన్ లోకోమోటివ్ కోచ్ ఫ్యాక్టరీలో మొదటిసారిగా ఈ తరహా ఇంజిన్లను తయారు చేస్తున్నారు. ఇక్కడ ప్రస్తుతం నాలుగు వందేభారత్ రైలు ఇంజిన్లను తయారుచేస్తున్నారు.
Vande Bharat Train Black Box : సెప్టెంబర్లో ఇంజిన్లను తయారుచేసిన తరవాత, వాటిని చెన్నైలోని ఇంటెగ్రల్ కోచ్ ఫ్యాక్టరీలో(ఐసీఎఫ్) పరీక్షిస్తారు. అనంతరం దేశంలోని వివిధ ప్రాంతాల్లో వందేభారత్ రైళ్లు నడుస్తున్నాయి. కొత్త వందే భారత్లో సీసీఆర్వీసీ అనే విమానంలోని బ్లాక్బాక్స్ తరహా సాంకేతికత ఉండనుంది. ఇది పైలట్ అన్ని కదలికలను గమనిస్తుంది. వాటిని ఆడియో, వీడియో రూపంలో భద్రపరుస్తుంది. రైలు ఏదైనా ప్రమాదానికి గురైతే ఈ బ్లాక్బాక్స్లోని సమాచారం ఆధారంగా ప్రమాదానికి గల కారణాలను గుర్తిస్తారు.
"గతంలో భారతీయ రైల్వే తయారు చేసిన WAP-5 కోచ్లు హై స్పీడ్ ఎలక్ట్రిక్ కోచ్లు. ఇప్పుడు వీటికి కొత్త రూపం ఇస్తున్నాం. ఇది ఏరో డైనమిక్ ఇంజిన్. రైలు ముందు భాగం 20 డిగ్రీలుగా ఉండేది, ప్రస్తుతం దాన్ని 45 డిగ్రీలు ఉండేలా తయారు చేశాం. దీని వల్ల ఇంజిన్లో గాలి నిరోధకత తగ్గి, రైలు శక్తి, వేగం పెరుగుతుంది. కొత్త డిజైన్లో రైలు ముందు భాగంలో ఉండే గ్లాస్ను పెద్దదిగా ఉండేలా తయారు చేశాం. దీంతో డ్రైవర్ ప్రతిదీ మరింత స్పష్టంగా చూడగలడు."
-దేబీ ప్రసాద్, చిత్తరంజన్ లోకోమోటివ్ కోచ్ ఫ్యాక్టరీ జనరల్ మేనేజర్
కొత్తగా వచ్చే వందేభారత్ రైలులోని ప్రత్యేకతలు...
- రైలుకు ముందు, వెనక రెండు ఇంజిన్లు ఉంటాయి. ఇవి ముందుకు, వెనక్కు ప్రయాణించేందుకు వీలుగా ఉంటాయి. రెండు ఇంజిన్లను ఒక పైలట్ మాత్రమే నియంత్రించగలిగే విధంగా సాంకేతికతను జోడిస్తున్నారు.
- 24 ప్యాసింజర్ కోచ్లను లాగగలిగే సామర్థ్యం ఈ ఇంజిన్లకు ఉంటుంది.
- ప్రయాణికుల భద్రత కోసం డిస్క్ బ్రేక్లను ఏర్పాటు చేస్తున్నారు.
- ఒకే ట్రాక్పై రెండు రైళ్లు ప్రయాణిస్తే ఆటోమేటిక్గా రైలు ఆగిపోతుంది.
- ఆధునిక సాంకేతికతతో కూడిన ఎయిర్ కండిషన్ డ్రైవర్ క్యాబిన్.
- కొత్త వందే భారత్ ఇంజిన్లను ఆ కోచ్ను పోలి ఉండేలా వివిధ రంగులలో తయారుచేస్తున్నారు.
రైళ్లపై రాళ్లు విసురుతున్నారా.. అమ్మో ఇంత పెద్ద శిక్ష విధిస్తారా..!
