భారత్‌లో కరోనా రెండోదశవ్యాప్తి భయపెడుతున్న వేళ మరో కీలక ఘట్టానికి నేడు తెర లేవనుంది. జనవరి 16 నుంచి ఆరోగ్య, ఫ్రంట్‌లైన్‌ సిబ్బందికి, మార్చి 1 నుంచి 45-59 ఏళ్ల మధ్య దీర్ఘకాలికవ్యాధిగ్రస్తులకు కరోనా టీకా పంపిణీని ప్రారంభించిన కేంద్రం నేటి(ఏప్రిల్ 1 ) నుంచి 45ఏళ్లు పైబడిన అందరికీ టీకా అందించనుంది. ఇందు కోసం దేశవ్యాప్తంగా అన్ని ప్రాంతాల్లో ఏర్పాట్లు చేశారు.
ఈ క్రమంలోనే టీకా డోసుల వృథాపై ప్రధానంగా దృష్టి సారించింది కేంద్రం. వృథాను ఒక్కశాతంలోపే కట్టడి చేయాలని రాష్ట్రాలు, కేంద్ర పాలిత ప్రాంతాలకు సూచించింది కేంద్ర వైద్య, ఆరోగ్య శాఖ.
కేంద్రం సూచనల్లోని కీలక అంశాలు..
- కరోనా టీకా కవరేజ్ తక్కువగా ఉన్న ప్రాంతాలను గుర్తించి, దిద్దుబాటు చర్యలు తీసుకోవాలి.
- టీకా వృథాను ఒకశాతం లోపునకు పరిమితం చేయాలి.
- దేశవ్యాప్తంగా టీకా వృథా సగటు 6 శాతంగా ఉంది. దానిని తగ్గించేందుకు ఎప్పటికప్పుడు సమీక్ష నిర్వహించాలి.
- టీకాల కాల పరిమితి ముగియకముందే.. సకాలంలో అందుబాటులో ఉన్న స్టాక్ను వినియోగించుకోవాలి.
- ఇప్పటి వరకు వైద్య సిబ్బంది, పారిశుద్ధ్య కార్మికులు, 60 ఏళ్లుపైబడిన వారు, 45 ఏళ్లు దాటి దీర్ఘకాలిక వ్యాధులతో బాధపడుతున్న 6.30 కోట్ల పైచిలుకు మందికి కేంద్రం టీకాలు పంపిణీ చేసింది.
ఇదీ చూడండి: 'మహా'లో 39 వేల కేసులు- కశ్మీర్ స్కూళ్లలో కరోనా కలకలం
