'కొవిడ్​ను నియంత్రించాలంటే టీకా పంపిణీ పెరగాలి'

కేంద్ర ప్రభుత్వం రోజువారి టీకాల పంపిణీని మరింత తగ్గిస్తోందని కాంగ్రెస్​ నేత రాహుల్​ గాంధీ ఆరోపించారు. రాష్ట్రాలకు కేంద్ర ప్రభుత్వమే వ్యాక్సిన్​ను సరఫరా చేయాలని ఆయన కోరారు. కరోనాను జయించాలంటే టీకానే ఏకైక ఆయుధం అని తెలిపారు.

కరోనా కట్టడిలో టీకానే కీలకమని కాంగ్రెస్​ నేత రాహుల్​ గాంధీ అన్నారు. ఇలాంటి పరిస్థితిలో కేంద్ర ప్రభుత్వం రోజువారి టీకాల పంపిణీని మరింత తగ్గిస్తోందని ఆరోపించారు. రాష్ట్రాలకు కేంద్ర ప్రభుత్వమే వ్యాక్సిన్​ను సరఫరా చేయాలని ఆయన కోరారు. అప్పుడే టీకా దేశంలోని ప్రతి గ్రామానికి చేరుతుందని తెలిపారు. అయితే ఇంత చిన్న లాజిక్​ కూడా మోదీ సర్కారుకు అర్థంకావడం లేదని అన్నారు.

ఏప్రిల్ నుంచి మే 20 వరకు టీకాల పంపిణీ తగ్గుముఖం పట్టినట్లు కనిపించే గ్రాఫ్​ను ఆయన షేర్​ చేశారు. రోజువారి టీకాల ఉత్పత్తితో పోల్చితే.. పంపిణీ చేసే టీకాల సంఖ్య తక్కువగా ఉందన్న అంశాన్ని గుర్తు చేశారు. ఈమేరకు ట్వీట్​ చేశారు.

"టీకాలను కేంద్ర ప్రభుత్వమే కొనుగోలు చేయాలి. రాష్ట్రాలకు పంపిణీ చేయాలి. కొవిడ్​ను అడ్డుకోవడానికే టీకా ఒక్కటే సరైన మార్గం. అందుకే దేశంలోని ప్రతి పల్లెకు టీకాలు అందుబాటులోకి తీసుకురావాలి. అదే విషయాన్ని కేంద్రం అర్థం చేసుకుంటే మంచిది."

- రాహుల్​ గాంధీ ట్వీట్​

దీనికి తోడుగా ఏప్రిల్‌లో 8.98 కోట్ల టీకాలు ఉన్నాయన్న ఆయన.. మే లో వాటి సంఖ్య 3.69 కోట్లకు పడిపోయిందని చూపించే గ్రాఫ్​ను ట్వీట్​కు జతచేశారు.

ఇదీ చూడండి: గౌతమ్​ గంభీర్​పై​ విచారణకు హైకోర్టు ఆదేశం!