కరోనా రోగుల్లో బ్లాక్ ఫంగస్ సమస్య తలెత్తడానికి కారణం స్టెరాయిడ్స్ను విచక్షణారహితంగా వినియోగించడమేనని పలువురు వైద్య నిపుణులు పేర్కొంటున్న నేపథ్యంలో ఇప్పుడో కొత్త అధ్యయనం వెలుగులోకి వచ్చింది. మధ్యప్రదేశ్లోని ఇందోర్కు చెందిన మహాత్మాగాంధీ స్మారక వైద్య కళాశాలలో మెడిసిన్ విభాగాధిపతి ప్రొఫెసర్ వీపీ పాండే 210 మంది బ్లాక్ ఫంగస్ రోగులపై చేసిన అధ్యయన వివరాలను రాజీవ్ జయదేవన్ అనే వైద్యుడు ట్విట్టర్లో పెట్టారు.
ఈ అధ్యయనం ప్రకారం బ్లాక్ ఫంగస్ సోకిన వారిలో 14% మంది స్టెరాయిడ్స్ ఉపయోగించలేదు. 21% మందికి మధుమేహం లేదు. 36% మంది రోగులు హోం ఐసోలేషన్లోనే ఉన్నారు. 52% మంది రోగులు మాత్రమే బయటి నుంచి ఆక్సిజన్ తీసుకున్నారు. జింక్ వినియోగంపై ఇందులో అధ్యయనం చేయలేదని తెలిపారు. బ్లాక్ ఫంగస్ సోకిన రోగుల్లో 100% మంది యాంటీబయాటిక్స్ తీసుకున్నట్లు అధ్యయనంలో తేలింది. "దీన్ని బట్టి చూస్తే.. ఈ ఇన్ఫెక్షన్ తలెత్తడానికి స్టెరాయిడ్స్, మధుమేహానికి మించి ఇతరత్రా కారణాలున్నట్లు అనిపిస్తోంది. రోగులకు సూచించిన మందుల్లో అజిత్రోమైసిన్, డాక్సీసైక్లిన్, కార్బాపెనెమ్స్ లాంటివి కనిపించాయి. అందువల్ల ఫంగల్ ఇన్ఫెక్షన్ పెరగడానికి యాంటీ బయాటిక్సే కారణంగా కనిపిస్తోంది" అని జయదేవన్ అభిప్రాయపడ్డారు.
ఇదీ చూడండి: 'నా వ్యాఖ్యలను ఉపసంహరించుకుంటున్నా'
ఇదీ చూడండి: భలే ఐడియా గురూ... రోగులకు 'రోబో' చికిత్స!
