బొలెరో-ట్రక్కు ఢీ.. 9 మంది మృతి.. డ్రైవర్​ నిద్రే బలి తీసుకుందా?

Road Accident Siddharthnagar: బొలెరో వాహనం ట్రక్కును ఢీకొనగా.. 9 మంది మృతిచెందారు. ఉత్తర్​ప్రదేశ్​ సిద్ధార్థ్​నగర్​లో జరిగిందీ ఘటన. ఈ ప్రమాదంపై దిగ్భ్రాంతి వ్యక్తం చేశారు ప్రధాని నరేంద్ర మోదీ. బాధిత కుటుంబాలకు పరిహారం ప్రకటించారు.

Road Accident Siddharthnagar: ఉత్తరప్రదేశ్‌లోని సిద్ధార్థ్‌నగర్ వద్ద ఘోర రోడ్డు ప్రమాదం జరిగింది. ఆగి ఉన్న ట్రక్కును అతివేగంగా వచ్చిన బొలెరో వాహనం ఢీకొట్టింది. ఈ ఘటనలో 9 మంది దుర్మరణం చెందారు. మరో ముగ్గురు తీవ్రంగా గాయపడ్డారు.

క్షతగాత్రులను సిద్ధార్థ్‌నగర్ జిల్లా ప్రభుత్వ ఆసుపత్రికి తరలించారు. గాయపడ్డ వారిలో ఒకరి పరిస్థితి విషమంగా ఉందని వైద్యులు తెలిపారు. ప్రమాదంలో బొలెరో వాహనం పూర్తిగా ధ్వంసమైంది. మితిమీరిన వేగానికి తోడు.. డ్రైవర్​ నిద్రే ప్రమాదానికి కారణమని పోలీసు అధికారులు అనుమానిస్తున్నారు.

నుజ్జునుజ్జయిన బొలెరో వాహనం

ఈ ఘటనపై విచారం వ్యక్తం చేశారు ప్రధాని నరేంద్ర మోదీ. మృతుల కుటుంబాలకు రూ. 2 లక్షలు, క్షతగాత్రులకు రూ. 50 వేల చొప్పున పరిహారం ఎక్స్​గ్రేషియా ప్రకటించారు. బాధితులు త్వరగా కోలుకోవాలని ఆకాంక్షించారు యూపీ సీఎం యోగి ఆదిత్యనాథ్​.

వెనుకనుంచి ట్రక్కును ఢీకొన్న బొలెరో

ఇవీ చూడండి: షాపింగ్​ మాల్​పై నుంచి జారిపడి యువతి మృతి.. ఏం జరిగింది?