UP Assembly Polls: ఉత్తర్ప్రదేశ్ ముఖ్యమంత్రి యోగి ఆదిత్యనాథ్ గోరఖ్పుర్ స్థానం నుంచి పోటీ చేయడం భాజపా వ్యూహాత్మక నిర్ణయం అని విశ్లేషకులు చెబుతున్నారు. ఈ ప్రాంతంలో ఆయనకు విశేష ఆదరణ ఉందని, 62 స్థానాలు కొల్లగొట్టాలనే లక్ష్యంతోనే ఏరికోరి ఈ స్థానాన్ని ఎంపిక చేసిందని చెబుతున్నారు.
2017 అసెంబ్లీ ఎన్నికల్లో యోగి ఆదిత్యనాథ్ ఈ ప్రాంతంలో విస్తృత ప్రచారం నిర్వహించారని పార్టీ వర్గాలు చెప్పాయి. ఆయన వల్లే గోరఖ్పుర్ సహా చుట్టుపక్కల జిల్లాల్లో 62 స్థానాలకు గానూ భాజాపా 44 స్థానాలు కైవసం చేసుకుందని తెలిపాయి.
అయితే ఈసారి అసెంబ్లీ ఎన్నికలకు ముందు ఈ ప్రాంతంలో అత్యధికంగా ఉన్న ఓబీసీ వర్గానికి చెందిన నేతలు పార్టీని వీడారు. స్వామి ప్రసాద్ మౌర్య, దారా సింగ్ చౌహాన్ సమాజ్వాదీ పార్టీలో చేరారు. 2017 అసెంబ్లీ ఎన్నికల్లో భాజపా కూటమిలో ఉన్న రాజ్భర్ 2019 సార్వత్రిక ఎన్నికలకు ముందు తెగదెంపులు చేసుకున్నారు. మంత్రి పదవిని కూడా వదులుకున్నారు. అయితే ఓబీసీల్లో మంచి ఆదరణ ఉన్న కాంగ్రెస్ నేత ఆర్పీఎన్ సింగ్ భాజపాలో చేరడం పార్టీకి కలిసొచ్చే అంశం.
Yogi Adithyanath Gorakhpur
మహారాజ్ జీ..
ఆదిత్యనాథ్ను గోరఖ్పుర్ ప్రాంతంలో 'మహారాజ్ జీ' అని పిలుస్తుంటారు. ప్రఖ్యాత గోరఖ్నాథ్ ఆలయ మఠాధిపదిగా అయన సేవలందించినందుకే అక్కడ అంత గుర్తింపు. అంతేగాకుండా 1998 నుంచి వరుసగా ఐదు సార్లు గోరఖ్పుర్ నుంచే లోక్సభకు ఎన్నికై సత్తా చాటారు. 2002లో యోగి స్థాపించిన హిందూ యువ వాహిని ప్రభావం కూడా గోరఖ్పుర్లో బాగానే ఉంది. అది కూడా భాజపాకు కలిసిరానుంది.
ఇదీ చదవండి: యోగి కోసం రంగంలోకి 'మానసపుత్రిక'.. అప్పుడు భాజపాకు ఝలక్.. ఇప్పుడు..
గోరఖ్పుర్ ప్రాంతంలో భాజపా అభ్యర్థుల ఎంపికలో యోగి ప్రమేయం ఉందని పార్టీ వర్గాలు వెల్లడించాయి. భాజపా రాష్ట్ర ఎన్నికల కమిటీలో యోగి సభ్యుడని, అభ్యర్థుల ఎంపిక విషయంలో కచ్చితంగా కీలక పాత్ర ఉందని చెప్పాయి.
ఉత్తర్ప్రదేశ్‌లో భాజపా తన సంస్థాగత నిర్మాణాన్ని ఆరు భాగాలుగా విభజించింది. అవి వెస్ట్ జోన్, బ్రజ్ ప్రాంతం, కాన్పూర్-బుందేల్‌ఖండ్, అవధ్, కాశీ, గోరఖ్పుర్. గోరఖ్పుర్ ప్రాంతంలో మొత్తం 10 జిల్లాలు ఉన్నాయి. గోరఖ్పుర్ సహా మహారాజ్గంజ్, దేవరియా, ఖుషీనగర్, బస్తి, సంత్ కబీర్నగర్, సిద్ధార్థ్నగర్, ఆజంగఢ్, బలియా, మవు ఈ ప్రాంత పరిధిలోకే వస్తాయి. ఆరు, ఏడు దశల్లో మార్చి 3, 7న ఇక్కడ పోలింగ్ జరగనుంది.
UP Assembly Elections 2022
ప్రచారకర్త..
యోగి 2017లో భాజపా ప్రముఖ ప్రచారకర్తగా ఉండటం వల్ల పార్టీకి ఎంతో ప్రయోజనం జరిగిందని, మరీ ముఖ్యంగా గోరఖ్పుర్లో ఆయన ప్రభావం అద్భుతమని ఈ ప్రాంత భాజపా ఉపాధ్యక్షుడు సత్యేంద్ర సిన్హా తెలిపారు. ఇప్పుడు గోరఖ్పుర్(అర్బన్) నుంచి ఆయనే స్వయంగా పోటీ చేస్తున్నందున ఇంకా ఎక్కువ ప్రయోజనం ఉంటుందని అభిప్రాయపడ్డారు.
స్వామి ప్రసాద్ మౌర్య ఎస్పీలో చేరడం వల్ల భాజపాకు ఏం నష్టం లేదని, ప్రధాని మోదీ, సీఎం యోగి అభివృద్ధి పనులే పార్టీని గెలిపిస్తాయని భాజపా పంచాయతీ సెల్ ప్రాంతీయ కోఆర్డినేటర్ అజయ్ తివారీ అన్నారు.
62 సీట్లకు 44
2017 అసెంబ్లీ ఎన్నికల్లో గోరఖ్పుర్ ప్రాంతంలో 62 స్థానాలకు భాజపా 44 చోట్ల విజయం సాధించింది. ఎస్పీ, బీఎస్పీ ఏడు స్థానాల చొప్పున గెలుచుకున్నాయి. కాంగ్రెస్, స్వతంత్రులు ఒక్కో స్థానానికి మాత్రమే పరిమితం అయ్యారు. అంతేగాక అప్పుడు భాజపా మిత్రపక్షాలుగా ఉన్న సుహెల్దేవ్ భారతీయ సమాజ్ పార్టీ(SBSP), అప్నా దళ్(సోనెలాల్) ఒక్కో స్థానాన్ని కైవసం చేసుకున్నాయి. అయితే ఎస్బీఎస్పీ ఈసారి ఎస్పీతో జతకట్టింది.
- గోరఖ్పుర్ ప్రాంతంలో వెనుకబడిన వర్గాలకు చెందిన ఓటర్లు 52శాతం
- ఎస్సీ ఓటర్లు 20శాతం
- బ్రాహ్మణులు, క్షత్రియులు వంటి ఉన్నత వర్గాల ఓటర్లు చెప్పుకోదగ్గ సంఖ్యలోనే ఉన్నారు.
- ఈ ప్రాంతంలోని 15 అసెంబ్లీ స్థానాల్లో ముస్లిం ఓటర్ల ప్రభావం ఉంటుంది.
UP Politics
బరిలో కీలక నేతలు..
గోరఖ్పుర్లోని ముఖ్య స్థానాల నుంచి వివిధ పార్టీలకు చెందిన కీలక నేతలు కూడా బరిలో ఉన్నారు. మౌర్య(పడ్రౌనా), చౌహాన్(మధుబన్), అసెంబ్లీలో ప్రతిపక్ష నేత రామ్ గోవింద్ చౌదరి(బాంస్హీడ్), రాష్ట్ర కాంగ్రెస్ అధ్యక్షుడు అజయ్ కుమార్ లల్లు(తమ్కుహీరాజ్), బీఎస్పీ నేత ఉమా శంకర్ సింగ్(రస్డా), మాఫియా నుంచి రాజకీయ నేతగా మారిన ముఖ్తర్ అన్సారీ(మవు) ఈ ప్రాంతంలోని వివిధ జిల్లాల నుంచి పోటీ చేస్తున్నారు. ఎస్పీ అధ్యక్షుడు అఖిలేశ్ యాదవ్ ఎంపీగా ప్రాతినిధ్యం వహిస్తున్న ఆజంగఢ్ కూడా గోరఖ్పుర్ ప్రాంత పరిధిలోనే ఉంది. అయితే ఆయన మెయిన్పుర్ జిల్లాలోని కర్హాల్ అసెంబ్లీ నియోజకవర్గం నుంచి పోటీ చేస్తున్నారు.
గోరఖ్పుర్లో మౌర్య, కుశ్వాహా, నోనియా-చౌహాన్ వర్గాల ఓట్లు కూడా మంచి సంఖ్యలోనే ఉన్నాయి. అందుకే ఎస్పీ తమకు స్వామిప్రసాద్ మౌర్య, దారా చౌహన్లున్నారనే ధైర్యంతో భాజపాకు సవాల్ విసురుతోంది.
ఎస్పీ ఏమంటోంది?
ఈసారి గోరఖ్పుర్లో భాజపా దారుణ పరాభవం చవి చూస్తుందని ఎస్పీ రాష్ట్ర కార్యదర్శి జియాల్ ఇస్లాం ధీమగా చెబుతున్నారు. ఆ పార్టీ తప్పుడు వాగ్దానాలు చేసిందని, రైతులు, యువత, దళితులు, వెనకబడిన వర్గాలు, మైనారిటీలను పట్టించుకోలేదని ఆరోపించారు.
ఎస్పీ హయాంలో జరిగిన అభివృద్ధి, మౌర్య, చౌహాన్ వంటి నాయకుల బలంతో తమ పార్టీ గోరఖ్పుర్ ప్రాంతంలో అధిక స్థానాలు కైవసం చేసుకుంటుందని విశ్వాసం వ్యక్తం చేశారు.
పడ్రౌనా నియోజకవర్గం నుంచి కుర్మీ సామాజిక వర్గానికి చెందిన ఆర్పీఎన్ సింగ్ను బరిలోకి దించడం వల్ల ఓబీసీల మద్దతు తిరిగి పొందగలమని భాజపా విశ్వాసంతో ఉంది. సింగ్ కాంగ్రెస్ హయాంలో కేంద్రమంత్రిగా పని చేశారు. ఖుషీనగర్ నుంచి ఎంపీగా గెలిచారు. పడ్రౌనా నుంచి ఎమ్మెల్యేగా కూడా విజయం సాధించారు. పూర్వాంచల్ ప్రాంతంలో సీనియర్ నాయకుడు. దీంతో ఇవన్నీ తమకు అనుకూలంగా మారతాయని కమలం పార్టీ భావిస్తోంది.
కాంగ్రెస్ ఏమంటోంది?
భాజపా అంచనాలు ఈసారి తలకిందులు అవుతాయని యూపీ కాంగ్రెస్ ఉపాధ్యక్షుడు విశ్వవిజయ్ సింగ్ పేర్కొన్నారు. గోరఖ్పుర్ ప్రాంతానికి చెందిన ఈయన.. యోగి ఆదిత్యనాథ్, ఆర్పీఎన్ సింగ్ ఓటర్లను ప్రభావితం చేయలేరని అభిప్రాయపడ్డారు. ఐదేళ్ల కాలంలో యువతను నిర్లక్ష్యం చేయడమే గాక నిరుద్యోగాన్ని పట్టించుకోలేదని ఆరోపించారు. దేశ ప్రజాస్వామ్య విలువలను కాపాడేందుకు ప్రియాంక గాంధీ పోరాడుతున్నారని తెలిపారు. ఈసారి కాంగ్రెస్ ప్రభావం ఉంటుందని చెప్పారు.
ఉత్తర్ప్రదేశ్ అసెంబ్లీ ఎన్నికలు ఫిబ్రవరి 10 నుంచి మార్చి 7 వరకు ఏడు దశల్లో జరగనున్నాయి. మార్చి 10న ఫలితాలు ప్రకటిస్తారు.
ఇదీ చదవండి: 30 పార్టీలతో కలిసి యోగిని ఢీకొడుతున్న 'భీమ్ ఆర్మీ' ఆజాద్
