వచ్చే ఏడాది ప్రథమార్ధంలో అయిదు రాష్ట్రాల శాసనసభలకు ఎన్నికలు జరగనున్న తరుణంలో ఉత్తర్‌ప్రదేశ్‌ రాజకీయాలు ఆసక్తికరంగా మారాయి. ముఖ్యమంత్రి మార్పు, మంత్రివర్గ విస్తరణ వదంతుల నేపథ్యంలో యోగి ఆదిత్యనాథ్‌ దిల్లీ సమాలోచనలు ప్రాధాన్యం సంతరించుకున్నాయి. దేశంలో భాజపా మళ్లీ అధికారంలోకి రావాలంటే 2022లో యూపీలో గెలవడం అత్యంత కీలకం. కానీ అక్కడి రాజకీయ, పాలనా పరిస్థితులు అందుకు ప్రతికూలంగా ఉన్నాయి. కరోనాను ఎదుర్కోవడంలో యోగి ప్రభుత్వం పూర్తిగా విఫలమైందనే భావన ప్రజల్లోకి బలంగా వెళ్లింది. ఆ ప్రభావం పంచాయతీ ఎన్నికల ఫలితాల్లోనూ కనిపించింది. సాధారణంగా స్థానిక ఎన్నికల్లో అధికార పార్టీయే అధిక స్థానాలను సొంతం చేసుకుంటుంది. కానీ, భాజపా మూడోవంతు స్థానాలకు మాత్రమే పరిమితమైంది. అధికారులపై ఆధారపడి సీఎం పాలన సాగించడంపట్ల సొంతపార్టీలో వ్యతిరేకత నెలకొంది. మంత్రులు, ఎంపీలు, ఎమ్మెల్యేలు బహిరంగంగానే విమర్శలు కురిపిస్తున్నారు. దీంతో అధిష్ఠానం దిద్దుబాటు చర్యలు ప్రారంభించింది. యోగిని పదవి నుంచి తప్పిస్తారనే వార్తలు వెల్లువెత్తాయి. అయితే, అదంత తేలిక కాదు.
అధిష్ఠానంతో పెరుగుతున్న దూరం
ప్రధాని మోదీ, యోగిల మధ్య మొదటి నుంచీ అంతగా సఖ్యత లేదు. 1998లో మొదటిసారి యోగి పార్లమెంటులోకి అడుగుపెట్టారు. ఆ తరవాత 2014 వరకు వరుసగా మొత్తం అయిదుసార్లు ఎంపీగా ఎన్నికయ్యారు. అయినా మోదీ ప్రభుత్వంలో ఆయనకు మంత్రి పదవి దక్కలేదు. ప్రస్తుతం జమ్ముకశ్మీర్‌ లెఫ్ట్‌నెంట్‌ గవర్నర్‌గా ఉన్న మనోజ్‌సిన్హాను 2017లో యూపీ ముఖ్యమంత్రిగా చేయాలని మోదీ ఆశించారు. ఆర్‌ఎస్‌ఎస్‌ మద్దతుతో యోగి ఆ పదవిని చేజిక్కించుకున్నారు. ఇటీవలి పరిస్థితులతో యోగి పనితీరు పట్ల అధిష్ఠానంలో అసంతృప్తి పెరిగింది. ప్రధానికి సన్నిహితుడిగా పేరుపొందిన మాజీ ఐఏఎస్‌ అధికారి ఎ.కె.శర్మను హడావుడిగా ఎమ్మెల్సీగా చేయడం, యూపీ మంత్రివర్గంలో ఆయనకు కీలక స్థానాన్ని కల్పించాలని అధిష్ఠానం ప్రయత్నించడం తనను అడ్డుకోవడానికేనని యోగి భావిస్తున్నారు.
విషెస్ చెప్పలేదు..
ఏటా జూన్‌ అయిదో తేదీన యోగి పుట్టినరోజు నాడు శుభాకాంక్షలు చెప్పే మోదీ, అమిత్‌ షా, జేపీ నడ్డాలు ఈసారి మౌనంగా ఉన్నారు. మే చివరి వారంలో దిల్లీలో మోదీ నాయకత్వంలో ఉత్తర్‌ప్రదేశ్‌ పరిస్థితులపై ఆర్‌ఎస్‌ఎస్‌ నేతలతో జరిగిన సమావేశంలో అమిత్‌ షా, జేపీ నడ్డాలతోపాటు రాష్ట్ర పార్టీ ప్రధాన కార్యదర్శి సునీల్‌ బన్సల్‌ మాత్రమే పాల్గొన్నారు. యోగికి, యూపీ బీజేపీ అధ్యక్షుడు స్వతంత్రదేవ్‌ సింగ్‌కి ఆహ్వానం అందలేదు. దీనితో యోగి అసంతృప్తికి గురయ్యారని, అందుకే ఆ తరవాత రాష్ట్ర పరిస్థితులపై అంచనా కోసం వచ్చిన ఆర్‌ఎస్‌ఎస్‌ నేత దత్తాత్రేయ హొసబలేని కలవలేదని పార్టీ వర్గాలు భావిస్తున్నాయి. కేంద్ర నాయకత్వం చేతిలో కీలుబొమ్మలాగా వ్యవహరించేందుకు తాను సిద్ధంగా లేననే సంకేతాలు పంపడానికే యోగి ఇలా చేశారనే వాదనలూ వినిపిస్తున్నాయి.
లాభం కంటే నష్టమే..!
ఉత్తర్‌ప్రదేశ్‌ గవర్నర్‌, స్పీకర్‌లతో జూన్‌ మొదటి వారంలో భాజపా ఉపాధ్యక్షుడు, రాష్ట్ర వ్యవహారాల ఇన్‌ఛార్జ్‌ రాధామోహన్‌సింగ్‌ భేటీ కావడం కొంత కలకలాన్ని రేపింది. ముఖ్యమంత్రిని మారుస్తారనే ఊహాగానాలు ఊపందుకున్నాయి. కానీ ఆయన వాటిని కొట్టిపారేశారు. ఎన్నికలు సమీపిస్తున్న సమయంలో యోగిని మార్చడం వల్ల లాభం కంటే నష్టమే ఎక్కువ ఉండవచ్చనే అభిప్రాయానికి అధిష్ఠానం వచ్చి ఉండవచ్చు. మోదీకి ఉన్నంత జనాకర్షణ శక్తి లేకపోయినా ఆయనకు ప్రత్యామ్నాయంగా... ఇతర భాజపా ముఖ్యమంత్రులతో పోలిస్తే యోగికి పార్టీలో గుర్తింపు బాగా పెరిగింది. గోరఖ్‌పుర్‌ పీఠాధిపతిగా, హిందూ యువవాహిని నేతగా చుట్టుపక్కల కొన్ని జిల్లాలకే పరిచయమైన ఆదిత్యనాథ్‌- ముఖ్యమంత్రి అయ్యాక జాతీయస్థాయిలో శక్తిమంతమైన హిందుత్వ ప్రతినిధిగా ప్రాచుర్యం పొందారు. కాబట్టి ఆయన విషయంలో అధిష్ఠానం దూకుడుగా వ్యవహరించకపోవచ్చు.
తప్పిస్తే నష్టమే!
కరోనా కట్టడిలో వైఫల్యం, గంగా నదిలో మృతదేహాల ప్రవాహం వంటి వాటితో రాష్ట్రంలో యోగి వ్యతిరేకతను మూటగట్టుకున్నారు. కానీ, యూపీలాంటి పెద్ద రాష్ట్రాన్ని సమర్థంగా నడిపించగలిగిన రెండో నాయకత్వం ఇప్పటికైతే సిద్ధంగా లేదు. మరోవైపు, తనను పదవి నుంచి తప్పిస్తే యోగి అంత తేలిగ్గా తీసుకోకపోవచ్చు. కల్యాణ్‌సింగ్‌, యడియూరప్ప, ఉమాభారతి, కేశూభాయ్‌ పటేల్‌లాగా ఎదురుతిరగవచ్చు. తన పీఠాన్ని, యువవాహినిని మరింత శక్తిమంతంగా పునరుద్ధరించుకొని పార్టీకి వ్యతిరేకంగా పనిచేస్తే హిందూ ఓట్లు చీలిపోయి ఇంకా ఎక్కువ నష్టమే వాటిల్లవచ్చు. దీంతో పరిస్థితులను అదుపులోకి తెచ్చుకునే ప్రయత్నాల్లో భాగంగానే మరికొన్ని వర్గాలను ఆకర్షించడానికి కాంగ్రెస్‌ ముఖ్యనేత జితిన్‌ ప్రసాదను భాజపాలోకి తీసుకొచ్చారు. మిత్రపక్షం అప్నాదళ్‌ నాయకురాలు అనూప్రియ పటేల్‌తో, నిషాద్‌ పార్టీకి చెందిన సంజయ్‌ నిషాద్‌తో అమిత్‌ షా చర్చలు జరిపారనే వార్తలు వెలువడుతున్నాయి. మోదీ సమ్మోహనాస్త్రం ఉత్తర్‌ప్రదేశ్‌ ఎన్నికల్లో ప్రభావం చూపించినా- ఆశించిన ఫలితాలు పూర్తిస్థాయిలో అందుతాయో లేదో అనే అనుమానాలు పార్టీలోనే వ్యక్తమవుతున్నాయి. ఈ పరిస్థితుల్లో మతం ఆధారంగా ఓటర్లను ఏకం చేయాలని భావిస్తే మాత్రం పార్టీకి యోగి కచ్చితంగా అవసరమవుతారు!
- ఎమ్మెస్‌
ఇవీ చూడండి:
